عزيز، صدّيق قارداشلرم!
إشاراتِ غيبيۀِ غوثيه و عَلويهده، آلتمش درتده رسالۀِ النور تأليفجه تمام اولور. ديمك او تاريخدن صوڭره، يالڭز ايضاحات و حاشيهلر و تتمّهلر اولاجق. بو مناسبتله ايكى نقطه إخطار ايتمك قلبمه گلدى:
برنجيسى: رسالۀِ النورڭ فطرةً و زمانڭ وضعيتنه گوره طلبهسى اولاجق، باشده معصوم چوجقلردر. چونكه بر چوجق كوچكلگنده قوّتلى بر درسِ ايمانى آلامازسه، صوڭره پك زور و مشكل بر طرزده إسلاميت و ايمانڭ أركانلرينى روحنه آلابيلير. عادتا غيرِ مسلم بريسنڭ إسلاميتى قبول ايتمك درجهسنده زور اولويور، يبانى دوشر. بِالخاصّه پدر و والدهسنى ديندار گورمزسه و يالڭز دنيوى فنلرله ذهنى تربيه اولسه، داها زياده يبانيلك ويرر. او حالده او چوجق، دنياده پدر و والدهسنه حرمت يرنده إستثقال ايدوب چابوق ئولمهلرينى آرزو ايله اونلره بر نوع بلا اولور. آخرتده ده اونلره شفاعتجى دگل، بلكه دعواجى اولور. نهدن ايمانمى تربيۀِ إسلاميه ايله قورتارمديڭز؟
ايشته بو حقيقته بناءً أڭ بختيار چوجقلر اونلردر كه؛ رسالۀِ النور دائرهسنه گيروب دنياده پدر و والدهسنه حرمت و خدمت و حسناتى ايله اونلرڭ دفترِ أعمالنه وفاتلرندن صوڭره حسناتى يازديرمقله و آخرتده اونلره درجهسنه گوره شفاعت ايتمكله بختيار أولاد اولورلر.
رسالۀِ النورڭ ايكنجى قسم طلبهلرى: فطرةً رسالۀِ النوره محتاج، بر درجه ده دنيادن اوركمش وياخود كوسمش قادينلردر. خصوصًا بر درجه ياشلى ده اولسه، رسالۀِ النور اوڭا حقيقى بر غداىِ معنويدر. چونكه رسالۀِ النورڭ درت أساسندن بريسى شفقتدر كه، إسمِ رحيمڭ مظهريتندن گلمش. قادينلرڭ ده أڭ أساسلى خاصّهلرى و فطرى وظيفهلرينڭ مايهسى، شفقتدر.