«سڭا إهانت ايدن أهمّيتسز آدملره قارشى، گُل و نور فابريقهسنڭ قهرمانلرينڭ خارق العاده حرمت و إحتراملرى واركن بويله بر ايكى وجدانسزڭ حقارتنه دگل، ميليونلرجه دشمنلرڭ إهانتلرينه قارشى گلهبيلير و حكمدن إسقاط ايدهبيلير» دييه قلبمه گلدى. فقط كندى شخصمه باقدم كه؛ قورومش، چورومش، وظيفهسى بيتمش بر خرما چكردگى حكمنده ايكن، رسالۀِ نور باغچهسنده بر درجه او چكردكدن تظاهر ايدن ميوهدار، محتشم قوجه بر آغاج نظريله باقديغڭزى گوردم. سزڭ فوق العاده حسنِ ظنّڭز او آغاجدن ايلرى گلديگنى و چكردگڭ ده بر جهتده، بر نوع وسيله اولديغى جهتنده حسنِ ظنّه مظهر اولمش گوردم.
او مكتوبڭ برنجى صحيفهسى گوزلدر؛ بن ده إشتراك ايدييورم. ايكنجى صحيفهده بر قاچ يرده قلم قاريشديردم، تعديل ايتدم. أزجمله: حضرتِ حسن رضى اللّٰه عنهڭ آلتى آيلق خلافتى ايله برابر رسالۀِ نورڭ جوشن الكبيردن و جلجلوتيهدن آلديغى بر قوّت و فيضله وظيفۀِ خلافتڭ أڭ أهمّيتليسى اولان نشرِ حقائقِ ايمانيه نقطهسنده حضرتِ حسن رضى اللّٰه عنهڭ قيصهجق مدّتنى اوزون بر زمانه چويرهرك تام بشنجى خليفه نظريله باقهبيليرز. چونكه عدالتِ حقيقيه ايله بو عصرده إنسانلرى مسعود ايدهبيلير بر إستعدادده بولونان، رسالۀِ نوردر و اونڭ شخصِ معنويسى، حضرتِ حسن رضى اللّٰه عنهڭ بر معاونى، بر متمّمى، بر معنوى ولدى حكمندهدر دييه سنڭ مكتوبڭى تعديل ايتدم. بوڭا قياسًا، سڭا وكالةً بر ايكى يرده قلم قاريشديردم. فقط عين گونده محكمه، كتابلرم ايچنده بڭا تسليم ايتدكلرى مكتوبلر مسودّهلرى و اونلرڭ اوستنده يشيل قلمله إشارتلرينه گوره چوق أهمّيت ويردكلرى او مسودّهلر ايچنده بو سزه يازديغم نقصان بر پارچهيى گوردم؛ فسبحان اللّٰه ديدم. مكتوبنه بنمله جواب وير دييه معناسنى آلدم. بلكه بو پارچه لاحقهيه گيرمش، بن ده سزه عيننى يازييورم. پارچه بودر: