دنيادن گيتمهسيله و شيمدى ده اونڭ مسلگى گرى چكيلمهسى و بر قسمى او مسلگڭ عكسنه دين لهنده رسمًا چاليشماسى و أهلِ ايمانڭ إستبدادِ مطلقهدن بر درجه قورتولماسى و آز بر تأويل ايله او رسالهجگڭ ويردكلرى خبر عين تاريخلرده وقوع بولماسى، او سورهنڭ بر لمعۀِ إعجازيدر. فقط هيجانلى تأويللرم پرده چكمشدى، حقيقت گيزلنمش.
* * *
عزيز، محترم قارداشم!
بيڭ اوچ يوز سنهدن بَرى عالمِ إسلامى آغلاتان و بتون أهلِ حقيقته «أيواهلر! يازيقلر اولسون!» ديديرن عالمِ إسلامڭ أڭ دهشتلى بيوك يارهسنى دشمك، دوشونمك؛ بنم خصوصى مشربمده تحمّلم فوقنده ألم ويرييور. خصوصًا يگرمى بش سنهدن بَرى إخلاص ايله حقيقى خدمتِ ايمانيه، بنى هر نوع سياستدن چكديگى و يگرمى بش سنه ظرفنده بر غزتهيى اوقوتديرمديغى گبى؛ يگرمى سنه بو إشكنجهلى أسارتمده حياتِ سياسيهيه باقمهمق ايچون حكومته مدافعاتِ حپسيهدن باشقه مراجعت ايتمهين و وظيفۀِ ايمانيهيه نقصان گلمهمك و إخلاص قيريلمامق و سياسته بولاشمامق ايچون اون سنه بو دهشتلى حربِ عمومىيه باقميان، باقديرميان بر حالتِ روحيهيى طاشيمغه مجبوريتم واركن؛ شيمدى دهشتلى أژدرهالر حقائقِ ايمانيه جبههسنده أهلِ ايمانه گوزيمز اوڭنده صالديرمالرندن و چوقلرى ايصيرمالرندن، أهلِ ايمانى قورتارمق مجبوريتى قرآنڭ أمريله واركن؛ بو زمانى بيراقوب، أسكى زمانه گيدوب، أهلِ بيته گلن دهشتلى ظلملرى تماشا ايتمك، داها زياده روحمى أزر و قوّۀِ معنويهيى قيروب روحمه عذاب عذاب اوستنه گلمكدر.