صايين بگم! كردلك سوزيله درلو حقارته هدف اولان ملا سعيد، سجيةً تقديره شايان بر تورك عاشقى و إسلاميت خادميدر (حاشيه). بوندن مملكتمز إجتماعًا ضرر دگل، معنًا فائده گورهجكدر. بن ناموس و شرفم نامنه شهادت ايدرم كه؛ ملا سعيد، قطعيًا تميز بر آدمدر. اونڭ ايچون، سزڭ گبى ملّتڭ داخلاً إداره و مقدّراتنه أل قويان درايتلى ذاتلردن إنسانيت نامنه تمنّياتم شودر: ياڭليش آڭلايشلى ژورنالجيلرڭ سوزلريله حرّيت نعمتندن، صاف هوا تنفّسندن، هر هانگى بر تورك قارداشيله گوروشمهدن محروم قالان بو آدمى، حكومتڭ عدالتى، مقامڭزڭ أهمّيتى نامنه و عدل و إحسان قضيهسنه توفيقًا اولسون، بو آدم حقّنده دخى عدالت و كنديسيله ده هيچ اولمازسه بر دفعه اولسون حسنِ نيّتله گوروشدكدن صوڭره اونڭ حقّنده إبقا ويا إفنا قرارينى ويرمك لطفنده بولونورسهڭز، ألبته أهمّيتلى وظيفهڭزى قانون دائرهسنده ايفا ايتمش اولاجغڭزدن طولايى تاريخچۀِ حياتڭزه تقديره دگر بر فصل درج بيورمش، عدالتپرورلگڭزى خلقه و عاجزلرى گبى باجاغى كسيلمش، كوشهده قالمش حرّ فكرلى وقعهنويسلره طويورمش اولورسڭز أفنديم.
ملّيتنى، مملكتنى جاندن سَون؛ تننده، قانندده، كردلك، آرناودلق، بوشناقلق قانى قوقوسى اولميان، أرضرومڭ أسكى ملّتوكيللرندن، باجاغى كسيك
يشيل اوغلى محمد صالح
___
(حاشيه): أوت هر برى يوزه مقابل بيڭلر تورك گنجلرى، معصوملرى، إختيارلرى، رسالۀِ نوره شاكرد اولمالرندن، بو عجيب عصرده، تورك ملّتنڭ دولتِ عبّاسيه إنقراضندن إسلام يارديمنه قوشمالرى گبى، بو شاكردلر دخى عينًا قوشديلر. دگل يالڭز سعيد، بلكه بتون أهلِ حقيقت تحسين ايدر، توركه دوست اولور.