چاليشهجقدى و بزلرى سياستِ إسلاميهيه باقمغه مجبور ايدهجكدى. حالبوكه رسالۀِ نورڭ مسلگندهكى سرِّ إخلاص؛ ايمان، قرآن حقيقتلرندن باشقه هيچ بر شيئه آلَت، تابع اولماديغى...
هم مشتريلرى آرامق دگل، بلكه مشتريلر حقيقى إحتياجنى حسّ ايدوب و يارهسنڭ تداويسى ايچون رسالۀِ نورى آراماسنڭ لزومى... حالبوكه گوندريلهجك او مبارك مركزلر، شيمديلك نورلره حقيقى إحتياجنى دگل، بلكه عالمِ إسلامڭ حياتِ دنياسنه عائد جهتلرى دوشونمگه مجبور اولماسى...
هم نور مسلگنده بنلك و گوستريش، بر نوع شهرتپرستلك مردود اولديغندن، بو أنانيت زماننده إنسانلره كندينى صاتمغه چاليشمق و بگنديرمك، بر آنده نور شاكردلرى بويله بيوك بر إمتياز گبى بو أثرلرله مشهور موقعلره كنديلرينى گوسترمك بر نوع گوستريش اولماسى جهتيله، قدرِ إلٰهى نور شاكردلرينى تام إخلاصڭ محافظهسى ايچون شيمديلك مساعده ايتمييور.
خامسًا: قهرمان و صداقتده هيچ صارصيلمادن و قارداشيله معصوم اولادلريله و آز زمانده پك چوق قيمتدار خدمت ايدن سليمان رشدينڭ دنياده، آخرتده جنابِ حق اونى معنوى و مادّى تجارتنده دائما اونى إحساننه مظهر أيلهسين، آمين!
سادسًا: «هو نكتهسى» پك اينجه، گرچه چوق مجمل و مختصر اولمش، فقط هركس اوندن پك قوّتلى بر نورِ ايمانى حسّ ايدهبيلير دييه سزه گوندرلدى. فقط او نكتهنڭ آخرلرنده «هر ذرّه، جذبهدارانه حال ديليله (لَا اِلٰهَ اِلَّا هُوَ ۞ قُلْ هُوَ اللّٰهُ اَحَدٌ) دييوب گزر» جملهسنه، «حال ديليله و مذكور حقيقتڭ شهادتى و لسانيله» كلمهلرى علاوه ايديلهجك. بو «هو نكتهسى» ايله يگرمى طوقوزنجى مكتوبڭ بشنجى قسمى اولان (اَللّٰهُ نُورُ السَّمٰوَاتِ) آيتى مناسبتيله بر سياحتِ