رأفت قارداش! سن ده چوق صفالر گلدڭ و رسالۀِ نور يازيسى ايله مشغوليتڭ بنى جدًّا سَوينديردى. خلوصى و صبرى گبى سنڭ ده سؤاللريڭڭ رسالۀِ نورده أهمّيتلى نتيجهلرى و طاتلى ميوهلرى وار. سنڭ يانڭده بولونان و رسالهلرده قيد ايديلمهين علمى پارچهلرى مناسب يرلرده ويا لاحقهده يازارسڭز.
قارداشلرم! عصاىِ موسى مجموعهسنڭ يازمهسنده بر تدبير خاطريمه گلدى. تقسيم الأعمال ايله بش آلتى ذات، عين قطعهده هر برى بر قسمنى يازسين؛ داها چابوق و داها قولاى اولور. هم اوصانديرماز، هم (بيوكلگى ايچون) يازمق جسارتنى قيرماز. تخمين ايدرم كه؛ بو چوق أهمّيتلى وظيفۀِ نوريه تام ايلرى گيتمهمسى بو سببدندر. يازيسى گوزل اولانلر، هر حالده بو يڭى تدبير ايله او وظيفهيه چاليشمالى.
قارداشلرم! چوق دقّت و إحتياط ايديڭز. صاقين صاقين خواجهلرله مناقشه ايتمهيڭز. ممكن اولديغى قدر مصالحهكارانه طاورانڭز، أنانيتلرينه طوقونمايڭز، بدعت طرفدارى ده اولسه ايليشمهيڭز. قارشيمزده دهشتلى زندقه واركن، مبتدعلرله اوغراشوب اونلرى دينسزلرڭ طرفنه سوق ايتمهمك گركدر. أگر سزه ايليشمك ايچون گوندريلمش خواجهلره راست گلسهڭز، ممكن اولديغى قدر منازعه قپوسنى آچمايڭز. علم كسوهسيله إعتراضلرى، منافقلرڭ أللرنده بر سند اولور. إستانبولده إختيار خواجهنڭ هجومى نه قدر ضرر ويرديگنى بيليرسڭز. ألدن گلديگى قدر رسالۀِ نور لهنه چويرمگه چاليشڭز.
عموم قارداشلريمه برر برر سلام.
* * *