عزيز قارداشلرم!
سزه ايكى پوصلهيى ليلۀِ رغائبدن آلتى ساعت أوّل يازدم. «حزب النوريه» كاغد ايله تسليمدن صوڭره، قطعيًا بنم قناعتمده بر نوع معجزۀِ أحمديه اولارق، ايكى آيدن بَرى متماديًا قوراقلق و ياغمورسزلق، هر طرفده دائما نمازلردن صوڭره پك چوق دعالرڭ عقيم قالديغى و هركس مأيوسيتدن دردِ معيشت أنديشهسيله قلبًا آغلاركن، بردن ليلۀِ رغائب (بتون عمرمده هيچ مِثلنى ايشيتمديگم و باشقهلر ده ايشيتمديگى) اوچ ساعتده يوز دفعه، بلكه فضله تكرار ايله مَلكِ رعدڭ يوكسك و شدّتلى تسبيحاتيله اويله بر رحمت ياغدى كه؛ أڭ معنّده دخى ليلۀِ رغائبڭ قدسيتنى و حضرتِ رسالتڭ بر درجه، بر جهتده عالمِ شهادته تشريفنڭ عموم كائناتجه و بتون عصرلرده نظرِ أهمّيتده و رحمةً للعالمين اولديغنى إثبات ايتدى و كائنات او گيجهيى آلقيشلايور دييه گوستردى. عجبا، دعالريمزده إسپارطه بو مملكتله برابردى، بو ياغمورده حصّهسى وار مى، مراق ايدييورم. شيمدىيه قدر چوق أمارهلرله رسالۀِ نور بر وسيلۀِ رحمت اولماسندن، بو رحمت ايما ايدر كه؛ هر حالده أهمّيتلى بر فتوحاتى پرده آلتنده واردر و بلكه سربستيتنه بر إشارتدر. هم بوراده «لمعهلر»ڭ ويرديگى إشتياق جهتيله يازيجيلرڭ چوغالماسى، إن شاء اللّٰه بر نوع مقبول دعا حكمنه گچدى.
* * *
عزيز، صدّيق، صارصيلماز قارداشلرم و وارثلرم!
بڭا قارشى شيمديكى تضييقاتڭ اوچ سببى وار:
برنجيسى: هيئتِ وكيلهنڭ قراريله، إعاشهم ايچون هر گون ايكى بچق بانقنوط و سائر مصرفلر ايچون ده بر تخصيصات و ايستديگم طرزده بر خانهيى