عزيز، صدّيق قارداشلرم!
أوّلا: سراج النورڭ صحّتلى، مكمّل، گوزل چيقماسى، مدرسة الزهرانڭ غايت أهمّيتلى بر يڭى درسيدر كه، گنيش دائرۀِ نوريهده مراقله اوقونهجقدر، إن شاء اللّٰه.
ثانيًا: قسطمونينڭ خسروى محمد فيضىنڭ هيچ صارصيلمادن كمالِ إشتياقله نورلره چاليشماسى و چاليشديريلماسى و اوقوتمسنى گوسترن نهادڭ و عبد الرحمٰن إحسانڭ مكتوبلرى گوسترديگى گبى، اورادن گلنلر ده عين خبرى ويرييورلر. تام شاكردلگنى ياپييور، اللّٰه موفّق أيلهسين، آمين! و نورڭ قهرمانلرندن مصطفى عثمانڭ قرهبوكده پرده آلتنده فعاليتله نوره خدمتنى و او حواليدهكى و أفلانيدهكى شاكردلرڭ شوق و غيرتنى ليلۀِ قدرلريله برابر تبريك ايدييورز.
(حاشيه): سراج النورى تصحيح ايدركن، بو رمضانده أهمّيتلى وردلريمه تام وقت بولامديغمدن متأثّر اولدم. بردن إخطار ايديلدى كه: اوقوديغڭ بو مبحثلر، بر جهتله عبادت اولديغى گبى؛ هم عينِ معرفت اللّٰه و ذكر اللّٰه و حضورِ قلبى و محبّتِ ايمانيه اولماسندن، سنڭ نقصان بيراقديغڭ وردلريڭڭ يرينى تام طولديرر. بن ده الحمد لِلّٰهِ ديدم.
* * *
أگر قولاى ايسه، إستانبوله گوندريلن كتابلر بورايه ده اوغراسه مناسب اولور. بنم ايچون ده يگرمى اوتوز نسخه إستانبولده جلدلنسه، بڭا گوندريلسه ايى اولور. شيمديلك فيآتى أليمده يوقدر كه گوندرهيم؛ هم چوقلره ده هديه ويرمگه مجبور اولويورم.