ممنونم؛ سز ده هيچ متأثّر اولمايڭز. ذاتًا بنم وظيفهم بيتمك اوزرهدر. رسالۀِ نور، خصوصًا مجموعهلرى، هر بر نسخهسى، سعيده قارشى حسنِ ظنّڭزڭ فوقنده اونڭ وظيفهسنى گورهبيلير و گورويور؛ و نور شاكردلرينڭ خاصلردن هر بر فداكارى، او سعيدڭ وظيفهسنى مكمّل گورهبيلير. إن شاء اللّٰه ايلريده تام گورهجكلر. بر سعيد ايچڭزده نقصان اولمقله، يوزر معنوى سعيد اولان مجموعهلر و بيڭلر مادّى سعيدلر، ايچڭزده خالص و مكمّل او وظيفهيى گورهبيليرلر و گورويورلر. بو حقيقته بناءً، بنم شخصمه و باشمه گلن حادثهلره چوق أهمّيت ويرمهيڭز. يالڭز چوق دعا ايديڭز.. ضعف و إختيارلق و زياده تأثّراتمه، بنجه مقبوليتلرى شبههسز اولان دعالريڭزله يارديم ايديڭز.
قهرمان طاهرينڭ نورجى معصومه، مرحومه مبارك هجرتى دنيادن جنّته هجرت ايتمهسى، حقيقةً بنى محزون أيلدى. اويله بر نور شاكردى و معصوم طائفهسنڭ أهمّيتلى بر چاليشقانى گيتمسى، نور حسابنه ده بنى متأثّر ايتدى. إن شاء اللّٰه اونڭ يرينه چوقلر گيرهجك، يرينى بوش بيراقميهجقلر. ناصلكه شيمديدن عشاقلى كوچوجك حيدر ميدانه چيقدى، هجرت ايدن همشيرهمڭ وظيفهسنى گورهجگم دييه بزى مسرور أيلدى. جنابِ حق، هجرتڭ پدر و والدهسنه و أقرباسنه صبرِ جميل إحسان ايدوب، هجرتى اونلره شفاعتجى أيلهسين و او مرحومهيى ده مرحومه همشيرهم خانمله جنّتده مسرور أيلهسين، آمين.
عشاقلى حيدره بنم طرفمدن اونى تبريك و نور خدمتنده توفيقنه دعا ايتديگمى و نورڭ معصوملر طائفهسى ايچنده داخل اولديغنى بيلديريڭز و اونڭ خواجهسى عزّته ده پك چوق سلام ايدييورم.
* * *