عزيز، صدّيق قارداشلرم!
شيمدى بر حالمى سزه بيان ايتمك لازم گلييور؛ تا باشقه سببلر سزى متأثّر ايتمهسين. او حال ده شودر:
بو يگرمى سنه تضييق نتيجهسى، أهمّيتلى و مزمِن بر خستهلق بڭا عارض اولمش. ذاتًا أسكيدن بَرى او خستهلغڭ أساسى بنده واردى كه؛ اوڭا مَرْدُمْگِرِيزْلك يعنى إنسانلردن چكينمك، تماس ايتمهمك، تماسدن متأثّر اولمق... حتّى شيمدى أڭ خفيف روحلى بر قارداشم، بر شاكردمله گوروشمهيى (فقط رسالۀِ نور خدمتنه عائد اولمامق شرطيله) روحم قالديرمييور. حتّى دوستانه باقمقدن جدًّا متأثّر اولويورم. بو أهمّيتلى حالده إنسانلرڭ بڭا قارشى ظلم و جنايتلرى بر وسيله اولديغى گبى؛ عنايتِ إلٰهيه و قدرڭ عدالتى و خدمتِ ايمانيهدهكى إخلاصڭ محافظهسى أڭ أهمّيتلى بر سببدر كه؛ هم ظلمِ جنايتِ بشريهيى هيچه اينديرييور؛ هم بو خستهلغى تام بڭا سَوْديرييور، صبر و تحمّل ويرر. ناصلكه إنسانلر أوهام يوزندن بنى تماسدن منع ايده ايده أعصابمه طوقونديرديلر؛ عنايتِ إلٰهيه دخى، خدمتِ ايمانيهدهكى إخلاصى قيرمامق و تصنّعكارانه خودفروشلق وضعيتنه گيرمگه مجبور ايتمهمك و زياده حسنِ ظن ايدنلرڭ قارشيسنده بنى تكلّفلره و گوستريشلره مجبور ايتمهمك و بو زمانده چوق تأثير ايدن شخصمه قارشى توجّه، محبّت و خدمته ضرر ويرن كندينى مقام صاحبى گوسترمك وضعيتندن قورتارمق و قرآندن گلن رسالۀِ نورڭ ألماس گبى حقيقتلرينى بڭا مال ايتمكله جام پارچهلرينه اينديرمهمك حكمتلريله، جنابِ أرحم الراحمين بڭا بو خستهلغى ويرمشدر. بن، جنابِ حقّه شكر ايدييورم. سز ده متأثّر اولمايڭز، ممنون اولڭز. فقط فطرى تألّملره قارشى تحمّلم ايچون دعاڭزه محتاجم.