وضعيتم، رسالۀِ نور شاكردلرينڭ فتوحاتلرينه بر وسيلهدر. عنايت و مرحمتِ إلٰهيه، حقّمده أهلِ دنيانڭ حقسزلقلرينى بيوك بر خيره چويرهجك قناعتندهيم. ذاتًا مسلگمزده زمان، مكان صحبتمزه مانع اولاماز. شرقده، غربده، حتّى آخرتده، برزخده اولسه ده برابرز. مثلا؛ برزخده حافظ على (رح)، هر گون معنًا يانمزدهدر. بو حقيقته بناءً، صورى آيريلمغه، حتّى ئولومه أهمّيت ويرمهملىيز.
رابعًا: مدرسۀِ نوريه قهرمانلرندن مرانغوز أحمدڭ بلبلى، گُل فابريقهسنڭ مبارك گلجى كاتبنڭ بلبلنى تصديق ايتمهسى پك لطيف اولمش. ذاتًا بهارده عموم قوشلر نامنه نباتات قافلهلرينڭ أرزاقِ حيوانيهيى گتيرمهلرينه قارشى بلبللر بر خطيبدر كه؛ اونلرى، قوشلر نامنه آلقيشلايور. رسالۀِ نورڭ قوشلر طرفندن علاقهدارلقلرى ايچنده ألبته ينه باشده بلبل گورونمك لازم گلييوردى كه، گوروندى.
صفرانبولىلى مخلص، متين قارداشمز مصطفى عثمان، بورادهكى قارداشلريمه بر ايكى مكتوب گوندردم دييور؛ مكتوبلرڭ جوابنى آلاماديغندن تلاش ايتمش. ايتمهسين. إحتياطه بناءً و إسپارطه واسطهسيله مخابرهيه إعتمادًا اوڭا آيرى مكتوب يازيلمامش؛ مراق ايتمهسينلر. قسطمونيلى قارداشلريمز ده تلاش ايتمهسينلر. نفوسمڭ بورايه نقلى، قسطمونى و اونلرله علاقهمى گوشتمز؛ بِالعكس داها قوّتلى بنى اونلرله باغلايور. بن، أكثر وقتده خيالاً و معنًا كنديمى قسطمونينڭ مبارك طاغلرنده و او قارداشلريمڭ ياننده بولويورم.
* * *