فؤاد و مصطفى صونغور و ايكى يوكسك طلبه اولان مصطفى اوروج و رحمىيى بولماسى و رسالۀِ نورڭ او قوّتلى أللرله خدمتنه چاليشماسى، او حوالى ايچون بيوك بر سعادتدر.
هم بعض جملهلرى تعديلاتله برابر «لاحقه»مزه گچيرديگمز مصطفى عثمانڭ و معلّم مصطفى صونغورڭ مشترك عجيب مكتوبلرى گوسترييور كه؛ مرحوم حسن فيضى نوعنده بر سنبل اوراده إنكشافه باشلامش، إن شاء اللّٰه چوق بيچارهلرڭ ايماننى قورتارهجقلر. خصوصًا اونلرڭ ماهيتنده و إسپارطهنڭ كوچك معصوم قهرمانلرينه بڭزر رحمى نامنده اون درت ياشنده بر مكتبلى چوجغڭ فداكارانه نورلرڭ درسلرينى غايۀِ حيات بيلمسى، بزلرى و نورجيلرى جدًّا سَوينديرييور. او حوالى ايچون گنجلرڭ قورتولمسنه بر فالِ خيردر.
رسالۀِ نورڭ ذو الفقار و سائر مجموعهلرڭ إنتشارى ايچون بيوك يارديملرده بولونان و مرحوم شهيد حافظ علىنڭ أڭ مكمّل طرزده يازديغى و نور فابريقهسنده تام چاليشقان بر آرقداشى و صادق بر وارثى اولان حافظ مصطفىنڭ ألنه أمانت بيراقيلان بتون رسالۀِ نور أجزالرى اونڭ ألنه گچمهسنى تأمين ايدن أحمد فؤادى و أمانتى اوڭا تسليم ايدن قارداشمز حافظ مصطفىيى و صفرانبولى مملكتنى و اورادهكى قارداشلريمزى روح و جانمزله تبريك ايدييورز. إن شاء اللّٰه ذو الفقاره ويرديگى هر بر بانقنوطه مقابل بيڭ كار گورهجك، بيڭلر خيرلره مدار اولاجق. هم اوڭا، هم قارداشلرندن خطيب إبراهيمه، هم يڭى بر فداكار معلّم اولان مصطفى صونغوره و كوچك بر صلاح الدين اولان رحمىيه و باشده مصطفى عثمان و حفظى اولارق اورادهكى بتون قارداشلريمزه سلام ايدرز.
* * *