معنوى قيشى، طماريمه طوقونور. عادتا بر ياريم نزول إصابتى گبى إضطراب چكدم. فقط لِلّٰهِ الحمد سزڭ مقبول دعالريڭز، او تهلكهيى ده خفيف بر صورته چويردى. إن شاء اللّٰه او صورت ده گچر؛ چوق ثوابلى فائدهسى، يرنده قالير.
قارداشلرم! صلاح الدّينڭ يازيسنه گوره، او حواليده دخى عصاىِ موسى مجموعهسى چوق فعاليتدهدر، فتوحات ياپييور. ديمك او طرفده او چوق أهمّيتلى وظيفۀِ نوريهيى ياپييور. يوز بيڭ الحمد لِلّٰهِ، يازانلره ده يوز ما شاء اللّٰه، بارك اللّٰه!
* * *
عزيز، صدّيق قارداشلرم!
أوّلا: حدسز شكر اولسون كه؛ إسپارطه، تام بر مدرسة الزهرا و جامع الأزهر اولاجغنى و اولمغه باشلاديغنى، قهرمان طلبهلرينڭ بو آغير شرائط آلتنده صارصيلمادن فعاليتلرى إثبات ايدييور. ديانتجه و قرآن و رسالۀِ نوره مشتاقانه چاليشمهلرى، حتّى علىكوينده، عليلرڭ غيرتيله چوق چوجقلرڭ طلبهلگه گيرمهلرى و ديگر بر كويڭ عموم گنجلرى گيجهده قرآنه چاليشمهلرى و جامعلر جماعتله طولمالرى، نور شاكردلرينڭ چكدكلرى بتون صيقنتيلرى هيچه اينديرييور.
ثانيًا: فوق العاده صداقت و علاقه طاشييان خليل إبراهيمڭ بو دردنجى شهنامهسى، بنم نوره خادملگم نقطهسنده حدّيمڭ پك فوقندهكى تعريفنامهسى گرچه چوق گوزلدر؛ فقط رسالۀِ نوردن زياده بنم شخصمه باقديغى جهتيله، شيمديلك سزه گوندرمدم، تعديلدن صوڭره گوندريلهجك. هم اوڭا، هم اونڭ رفقالرينه بِالخاصّه سلام ايدرز.