عزيز، صدّيق قارداشلرم!
حدسز شكر اولسون كه؛ رسالۀِ نور يرينه بنى صيقييورلر، بنمله مشغول اولويورلر. هيچ مراق ايتمهيڭز، (عَسٰٓى اَنْ تَكْرَهُوا شَيْئًا وَهُوَ خَيْرٌ لَكُمْ) سرّيله إن شاء اللّٰه بو يڭى حادثهده دخى بر خير اولاجق.
حادثه بودر:
جيلانى و ايكى آرقداشلرى، (كه بڭا خدمت ايدييورلردى) يانمه گلمهلرينى منع ايتديلر. آناختارى اونلردن آلديلر، بكجيلره ويرديلر. او بكجيلردن بريسى گلييور، صو و أكمك گبى ايشلريمى گورويور. بن بونڭ سببنى بيلهمدم. فقط بو قصبهده بر پارتى منازعهسى وار. چوجغڭ بر عموجهسى (حاشيه) بر طرفدهدر. اونڭ معارضلرى ياپييور إحتمالى وار.
هم هر طرفده رسالۀِ نورڭ فتوحاتى و خارجدن گلن آنارشيستلك مداخلهسى سببيت ويردى ظن ايدرم. و صانديقلىده ألده ايديلن مكتوباتله، بر واسطۀِ مخابره اولماسى بهانهسيله، بو صيقنتىيى ويرديلر. سز هيچ تلاش ايتمهيڭز، بونڭ ده هيچ أهمّيتى يوقدر. سز، ينه أسكى گبى بڭا يازارسڭز. فقط بن، كندم چوق يازهمييورم. گويا بنى، إهانت و حقارتله چوروتمكله رسالۀِ نورڭ فتوحاتنه سد چكيلهجك. ديوانهلكلرندن، اوفلهمكله ميليونلر ألكتريق قوّتنده بولونان رسالۀِ نور گبى بر حقيقت گونشى سونهجك دييه، (زياده ثوابى بڭا قزانديرمق ايچون) بنى فضله صيقييورلر.
مدارِ عبرت و دقّت بر توافقدر كه؛ دون، چوجقله پدرينى ضابطه جلب ايدوب إفادهلرينى آلديغى عين دقيقهده، أهمّيتلى بر وقوعاتى، تلفونِ ضابطه خبر
___
(حاشيه): مرحوم عبد اللّٰه چاليشقاندر. دموقرات پارتىيه، مخالفتده ايكن إنتساب ايتمشدى.