قارداشلرم دائرهسى ايچنده إسملرينى بيلديگم ذاتلرى، إسملريله دعا وقتنده ياد ايدييورم. رسالۀِ نور شاكردلرندهكى شركتِ معنويه إعتباريله، بنم چوق نقصان قزانجمدن حصّه آلدقلرى گبى؛ بتون شاكردلرڭ بتون قزانجلرندن ده حصّهلر آلمغه يول آچيلديغنى؛ بنم طرفمدن سلاممى حرمتلرمله اونلره تبليغ ايديڭز. إسپارطه قهرمانلرى گبى، قونيهنڭ مبارك عالملرى رسالۀِ نوره صاحب چيقدقلرندن، داها دنياجه، وظيفۀِ نوريهيه بر أنديشهم قالمادى. او مبارك و قوّتلى أللره رسالۀِ نورى أمانت ايدوب راحتِ قلب ايله قبريمه گيدهبيليرم.
ثانيًا: الحقّ، آز بر زمانده رسالۀِ نوره پك چوق فائدهسى طوقونان و اون سنهدن بَرى رسالۀِ نوره چاليشمش گبى خاصلر دائرهسنده بولونان مصطفى عثمانڭ، أميرطاغندهكى قارداشلرينه، يانغين مناسبتيله گچمش اولسون مقامنده نوعِ بشر يانغيننى بحث ايدوب، گوزل بر مكتوب يازمش. اونڭ مكتوبنڭ بر قسمنى هم لاحقهده، هم سكّۀِ غيبيهده قيد ايدييورز؛ صوڭره صورتنى سزه گوندرهجگز. بنم طرفمدن هم اوڭا، هم يانندهكيلره، هم واسطۀِ مخابره اولديغى قسطمونى و اينهبوليدهكى قارداشلريمزه پك چوق سلاملرله برابر؛ خطّى گوزل، وقتى مساعد اولانلر، إسپارطه و جوارى گبى عصاىِ موسى مجموعهسنى يازسهلر، چوق مناسب اولور. بو وظيفۀِ نوريه، إن شاء اللّٰه مطبعهنڭ چوق فوقنده ايش گورهجك.
ثالثًا: حافظ أمينڭ رسالۀِ نوره چوق خدمتى وار. اونڭ قصبهسى اولان كوره، گچن حادثهدن أوّل نورى، حقّى، إحسان و مرحوم معلّم عثمان گبى ذاتلرڭ همّتيله بر مدرسۀِ نوريه حكمنه گچوب پارلاق بر صورتده نوره چاليشييوردى. إن شاء اللّٰه او قيمتدار خدمتى، ممكن اولدقجه ينه ياپاجق. گرچه گچن مصيبتده أڭ زياده اونلر اوزولديلر، فقط اوڭا مقابل رسالۀِ نورڭ گنيش مظفّريتنده او قصبهنڭ و او فداكار قارداشلريمزڭ حصّهلرى چوق أهمّيتليدر.