عموم قارداشلريمزڭ گلهجك مبارك رمضانِ شريفڭزى و گچمش برائت گيجهلريڭزى بتون روح و جانمزله تبريك ايدييورز. جنابِ حق، اونلرڭ و بزلرڭ حقّمزده بو رمضاندهكى ليلۀِ قدريمزى بيڭ آيدن خيرلى و بيڭ آى قدر مدارِ ثواب أيلهسين، اُمّتِ محمّديهيه سعادت و سلامت ويرسين، آمين!
هم جملهڭزه برر برر سلام ايدن قارداشڭز
سعيد النورسى
* * *
عزيز، صدّيق، متين، صارصيلماز، ثباتكار، فداكار، وفادار قارداشلرم!
بيليرسڭز كه آنقره أهلِ وقوفى رسالۀِ نوره عائد كرامتلرى و إشارتِ غيبيهلرى إنكار ايدهمهمشلر. يالڭز، ياڭليش اولارق او كرامتلرده بنى حصّهدار ظن ايدوب إعتراض ايدهرك، «بويله شيلر كتابده يازيلماملى ايدى؛ كرامت إظهار ايديلمز.» دييه خفيف بر تنقيده مقابل مدافعاتمده اونلره جوابًا ديمشدم كه:
اونلر بڭا عائد دگل و او كرامتلره صاحب اولمق بنم حدّم دگل. بلكه قرآنڭ معجزۀِ معنويهسنڭ ترشّحاتى و لمعهلريدر كه حقيقى بر تفسيرى اولان رسالۀِ نورده كرامتلر شكلنى آلارق (شاكردلرينڭ قوّۀِ معنويهلرينى تقويه ايتمك ايچون) إكراماتِ إلٰهيه نوعندندر. إكرام ايسه، إظهارى بر شكردر، جائزدر، هم مقبولدر. شيمدى أهمّيتلى بر سببه بناءً بو جوابى بر پارچه ايضاح ايدهجگم. و «نه ايچون إظهار ايدييورم و نه ايچون بو نقطهده بو قدر تحشيدات ياپييورم و نه ايچون بر قاچ آيدر بو موضوعده چوق ايلرى گيدييورم. أكثر مكتوبلر او كرامته باقييور؟» دييه سؤال ايديلدى.