أوهاملانديرديلر. بر مقصدلرى؛ بنم صبرم توكنسين، آرتيق يتر ديديرتسينلر. ذاتًا اونلرڭ شيمدى بندن قيزدقلرينڭ بر سببى؛ سكوتمدر، دنيايه قاريشمامقدر. عادتا نه ايچون قاريشمييورسڭ، تا قاريشسين مقصديمز يرينه گلسين دييورلر.
عليهمه حكومتڭ بر قسم مأمورلرينى أوهاملانديرمقده إستعمال ايتدكلرى بر ايكى دسيسهلرينى بيان ايدييورم.
ديرلر: «سعيدڭ نفوذى وار. أثرلرى هم تأثيرلى، هم كثرتليدر. اوڭا تماس ايدن، اوڭا دوست اولور. اويله ايسه، اونى هر شيدن تجريد ايتمك و إهانت ايتمكله و أهمّيت ويرمهمكله و هركسى اوندن قاچيرمقله و دوستلرينى اوركوتمكله نفوذينى قيرمق لازمدر» دييه حكومتى شاشيرتير، بنى ده دهشتلى صيقنتيلره صوقارلر. بن ده ديرم:
أى بو ملّت و وطنى سَون قارداشلر! أوت او منافقلرڭ ديدكلرى گبى، نفوذ وار. فقط بنم دگل، بلكه رسالۀِ نورڭدر. و او قيريلماز، اوڭا ايليشدكجه قوّتلشير. و ملّت و وطن عليهنده هيچ بر وقت إستعمال ايديلمهمش و ايديلمز و ايديلهمز. ايكى عدليه، اون سنه فاصله ايله شدّتلى و حدّتلى يگرمى سنهلك أوراقمى تدقيقات نتيجهسنده، بر حقيقى سبب جزامزه بولمامسى، بو دعوايه جرح ايديلمز بر شاهددر.
أوت أثرلر تأثيرليدر. فقط ملّت و وطنڭ تام منفعتنه و هيچ بر ضرر طوقونديرمادن يوز بيڭ آدمه قوّتلى ايمانِ تحقيقى درسى ويرمكله، سعادت و حياتِ أبديهلرينه تام خدمتده تأثيرليدر. دڭزلى حپسخانهسنده، قسمًا آغير جزا ايله محكوم يوزلر آدم، يالڭز ميوه رسالهسيله غايت اوصلى و متديّن صورتنه گيرمهلرى؛ حتّى ايكى اوچ آدمى ئولديرنلر، اونڭ درسيله داها تخته بيتنى ده ئولديرمكدن چكينمهلرى و او حپسخانه مديرينڭ إقراريله، حپسخانهنڭ بر تربيه مدرسهسى حكمنى آلماسى، بو مدّعايه ردّ ايديلمز بر سنددر، بر حجّتدر.