قَومِ لوطڭ باشنه گلن أحجارِ سماويهيى آڭديران سماوى طاشلر او تاريخلردن صوڭره گلهجگنى خبر ويروب تهديد ايدييور. و رسالۀِ نورڭ سورۀِ فيل نكتهسنه عائد بياناتى ايچنده حاشيهلى بو جمله وار: «أوت بو طوقاتلردن پرشر بشر، شركدن شكره گيرمزسه و قرآنه ترضيه ويرمزسه، ملائكه أللريله ده أحجارِ سماويه باشلرينه ياغاجغنى، بو سوره بر معناىِ إشارى ايله تهديد ايدييور.»
ايشته بو فقره طوغريدن طوغرىيه بو طاشلره إشارتى اولماسنه ايكى أماره وار:
برنجيسى:
شيمدىيه قدر گلن سماوى طاشلر بر ايكى قاريش اولدقلرى حالده، بويله يگرمى بش متره اوزونلغنده و اون متره گنيشلگنده طاغ گبى طاشلر، ألبته سماواتڭ دينسزلگه قارشى بر علامتِ حدّتيدر. سورۀِ فيل معجزانه اوڭا باقماسى، اونڭ تفسيرى اوڭا إشارت ايتمهسى حقيقتدر. او حادثهنڭ او إخباره لياقتى وار. چونكه أمثالسزدر.
ايكنجى أمارهسى:
بتون زمين يوزينى و نوعِ بشرى تهديد ايدن دهشتلى بر دينسزلگڭ مركزلرينه گلمهسيدر. و دينسزلر بونى حسّ ايتمشلر كه؛ كوچوجك حادثهلرى أهمّيتله نشر ايتدكلرى حالده، بر ايكى آيدر بو عجيب دهشتلى حادثهيى، أللرندن گلديگى قدر شعشعهلانديرمامغه چاليشمشلر.
* * *