مغازهلرى، او يانغين يرى ايله ايكى كوچك دكّان فاصله ايله او دهشتلى يانغين بتون شدّتيله مغازهيه طوغرى گليركن بيچاره جيلان يانمه گلدى، ديدى: «بز يانييورز، محو اولدق.» بن ده ايكى گون أوّل مغازهلرنده بولونان آيت الكبرانڭ بر قسم مطبوع نسخهلرينى يانمه گتيرمك ايچون سويلهدم، فقط گتيرمدى. ديمك او آتشى سوندورمك ايچون اوراده قالمشدى. بن ده رسالۀِ نورى و آيت الكبرايى شفاعتجى ياپوب: «يا ربّى قورتار» ديدم. اوچ ساعت او دهشتلى يانغين هجومنده بتون او بيوك دائرهيى محو ايتدى. آلتنده و بتيشيگندهكى دكّانلرى بتون ياقدى، ييقديردى. رسالۀِ نورڭ و آيت الكبرانڭ حفظنده اولان مغازهيه قطعيًا ايليشمدى و آلتندهكى شاكردڭ دكّانى ده مستثنا اولارق صاغلام قالدى. يالڭز أهالى جاملرينى قيرديلر. أگر أهالى ايليشمسه ايدى، أشيالرينى آلماسه ايديلر، هيچ بر ضرر اولميهجقدى.
ايشته إسپارطه خاليجيخانهسنڭ يانغينى ايله، رسالۀِ نورڭ درسلرينه كوشكلرينى تخصيص ايدن ذاتلرڭ او دهشتلى يانغينله بتيشيك ايكى قارداشنڭ ايكى خانهسنڭ قورتولماسى رسالۀِ نورڭ بر كرامتى اولديغى گبى؛ قسطمونيده عينًا بو أميرطاغى يانغينى گبى، اوراده قارشيمدهكى دهشتلى بر يانغينڭ إتّصالندهكى رسالۀِ نور شاكردلرندن حافظ أحمدڭ أوى خارقه بر صورتده قورتولماسى و همشيرهسنڭ اوچنجى قات يانغين ايچنده خارقه بر طرزده، هم ألماس و آلتون مجوهراتنى، هم جاننى رسالۀِ نورڭ بركاتيله قورتارماسى مِثللو؛ بوراده ده بو يانغينده، رسالۀِ نورڭ چاليشقان طلبهلرندن و چاليشقان خانَدانندن اوچ قارداش اولارق درت ذاتڭ او دهشتلى يانغيندن قورتولماسى، رسالۀِ نورڭ و آيت الكبرانڭ بر كرامتى اولديغنه هم بنم، هم اونلرڭ، هم سائر قارداشلريمزڭ قطعى قناعتمز گلدى. بوراده أكسيك اولميان آز بر روزگار أسسه ايدى، او چارشو دكّانلرينڭ أكثريسنى يانديرهبيليردى. حتّى آيت الكبرا مغازهسندن اون- اونبش دكّان تا اوزاقده أشيالرينى چيقاروب قاچيرديلر.