بورادهكى قومشولر و بتون دوستلر بيليرلر كه؛ بن عشاء نمازندن صوڭره، تا صباحه قدر هيچ كيمسهيى يانمه قبول ايتمهمشم. ايشته بويله بر إفترايه بر سفيه، أحمق إنسان أشك اولسه، صوڭره شيطان اولسه، بوڭا إحتمال ويرمز. او آدم آڭلادى، او گبى پلانلردن واز گچدى، بورادن باشقه يره جهنّم اولوب گيتدى.
اونڭ رسميت جهتيله بنى دگل، بلكه نورجيلرى لكهدار ايتمك ايچون قورديغى پلانى ايله، بو يڭى حادثهيى وسيله ايدوب شاكردلره لكه سورمك ايستهنيلدى. فقط حفظ و حمايت و عنايتِ إلٰهيه، او پلانى ده خارقه بر طرزده عقيم بيراقدى. بو بيانله بن نفسمى تبرئه ايتمييورم، بلكه «قدسى خدمتِ ايمانيه، او نفسى بتون هوساتندن واز گچيرمش و او خدمتدهكى معنوى ذوق اوڭا كافى گلييور» ديمك ايستهيورم و نورجيلرڭ إحتياط و دقّته إحتياجلرينى بيان ايدييورم.
ثانيًا: ماكينه ايشنده تجربهلى و مقتدر خصوصى كاتبى سزه گوندرييورم. كندم زحمتله يازديغمدن، بوندن صوڭره قيصهجه يازاجغم، گوجنمهيڭز.
ثالثًا: أفلانى طرفلرندن خطيب محمد توفيقه سلام ايدييورم، رؤياسى مباركدر.
رابعًا: بو دقيقهده قسطمونى خسروى محمد فيضىنڭ تبريك و نور فتوحاتنڭ مژدهلرينى حاوى پارلاق، گوزل مكتوبنى آلدم و او قيمتلى قارداشمز باشده اولارق حلمى، أمين، بشقارداشلر، علويهلر، زهرالر، لطفيهلر گبى نورجى همشيرهلريمزڭ هم ليالئِ عشرهلرينى، هم بايراملرينى روح و جانمزله تبريك ايدييورز. هم خلوصينڭ، هم فيضىنڭ مكتوبلرينى لفًّا گوندرييورز.
* * *