عزيز، صدّيق قارداشلرم!
تكرار مبارك رمضانڭزى تبريك ايدرز. ايكى قهرمان قارداشڭ و معجزاتِ أحمديهده يدى چوجغڭ بر جهتده بر سكزنجيسى حكمنه گچن سليمان رشدينڭ مبارك كريمهسنڭ ماكينه ايله ذو الفقارِ معجزاته چاليشماسنى و خسرو و طاهرينڭ شيرين و دقّتلى يازيلرينى تكثير ايتمگه فداكارانه درعهده ايتمهلرينى بتون روح و جانمزله اونلرى تبريك ايدهرك، شيمدىيه قدر پك فوق العاده نورلره ايتدكلرى قيمتدار و ميوهدار سابق خدمتلرينه قارشى، رسالۀِ نور حسابنه بيڭلر ما شاء اللّٰه و بارك اللّٰه و وَفَّقَكُمُ اللّٰه ديرز (حاشيه).
* * *
عزيز، صدّيق، فداكار قارداشلرم!
اينهبولى قهرمانلرينڭ تبريك مكتوبلرنده ايكى توافق و ايكى قوشڭ غريب زيارتلرى چوق معنيداردر. أوت، بنم بر تك مكتوبمى يازان بر تك آدمڭ حكومتجه آراشديريلماسى و أهمّيتله باقيلماسى تضييقى زماننده، شخصمدن بيڭلر درجه
___
(حاشيه): لطيف بر توافقدر كه، بر آيدن بَرى بوراده هيچ ياغمور گلمييوردى و قلبمز دخى معلوم تعرّضدن نورجيلره گلن فتوردن آغلايوردى. بردن خسروڭ ايكى گون أوّل ماكينه مژدهسى و نظيفڭ بوگون تفصيللى مكتوبى و ماكينهنڭ يازيسنڭ نمونهسى أليمه ويريلديگى عين زمانده، (و بڭا خدمت ايدنلر) أسكيشهر أذانِ محمّدىيى اوقومغه باشلاماسى و معلوم چاوشه بڭا إهانت ايچون أمرِ جبرى ويرن آدم طوقات ييديگنى ديدكلرى عين وقتده رحمت ياغموريله، چوقدن آغلايان محزون قلبلريمزڭ بيوك فرحلرينه و سَوينج و إنشراحلرينه تام تامنه توافقى و تطابقى، إن شاء اللّٰه بر فالِ خيردر.