يگرمى يدنجى مكتوبڭ لاحقهسنڭ ذيلى
﴿بِاسْمِهٖ سُبْحَانَهُ﴾
﴿اَلسَّلَامُ عَلَيْكُمْ وَرَحْمَةُ اللّٰهِ وَبَرَكَاتُهُ﴾
عزيز، صدّيق قارداشلرم!
بو دفعه شهيد مرحوم حافظ علىنڭ أهمّيتلى بر وارثى و دڭزلى طلبهلرينڭ يوكسك بر ممثّلى و دڭزلى شهرينڭ رسالۀِ نوره قارشى فوق العاده توجّهنڭ بر ترجمانى قارداشمز حسن فيضىنڭ أديبانه، رسالۀِ نور حقّنده فوق العاده ثناكارانه پك اوزون بر مكتوبنى آلدم (*). رسالۀِ نورڭ بڭا تسليم اولماسى مناسبتيله، قارداشمز حافظ مصطفىنڭ چاليشماسى حقّنده يازديغم مكتوبڭ ايچنده رسالۀِ نورڭ چوق أهمّيتلى قيمتنى مختصر بر صورتده بياناتمه و حسِّ قبل الوقوع مكتوبلرمدهكى أهمّيتلى دعوالريمه بو اوزون مكتوب تام بر ايضاح و دڭزلى شهرينڭ رسالۀِ نور لهنده بر قوّتلى شهادتى و بر شاهدى اولمق جهتيله، هم بو ذات مكتب فنلرنده چوق زمان علاقهدار اولوب قِدَملى بر معلّم و عالم اولماسى حيثيتيله، رسالۀِ نور حقّندهكى بو پارلاق شهادتى چوق أهمّيتلى گوردم. يالڭز، بڭا باقان قسملرى يا طىّ ويا تعديل ايتمگى مناسب گوردم. بر، ايكى، اوچ يرده ده هركسه گوسترمك مناسب گورمديگمدن، چيزگى آلتنه آلدم و سزلره ده يگرمى يدنجى مكتوبڭ ويا لاحقهسنڭ بر ذيلى اولارق گوندردم. بو پارچه مكتوبمى، اونڭ مكتوبنڭ باشنده يازهبيليرسڭز. حسن فيضى قارداشمز، اونڭ بعض جملهلرينى طىّ ايتمهمدن گوجنمهسين. چونكه عموم طلبهلره او طىّ اولونان قسم لازم دگل، خصوصى بعضلرده قالابيلير.
___
(*): بو اوزون مكتوبڭ تمامى، قونفرانس إسملى كتابده نشر ايديلمشدر.