ثانيًا: محكمهدهكى مدافعاتڭزى بگندم، گوزلدر. تشرين يگرمى ايكىيه تأخيرى ده خيرليدر. ذاتًا اونلرڭ ألندهكى قسمى، رسمى آدملرڭ بر جهتده حصّهلريدر، اوقوسونلر. اوقوماسهلر ده ياقينلرنده دائرهلرنده بولونماسى و اونلر وظيفةً اونلرڭ حقائقيله مجملاً مشغول اولماسى، معنوى درس آلييورلر. هيچ مراق ايتمهيڭز، نورلرڭ إنكشافى و فتوحاتى گيتدكجه زيادهلشيور، رسمى آدملرڭ چوقلرينى ايچنه آلييور. رسمى مأمورلره بر مراق دوشمش، آرايورلر؛ بولدقلرى وقت طوقاتنى ييدكلرى حالده ألنى اوپويورلر.
ثالثًا: كوچك إسپارطهنڭ قهرمانلرندن كوچك إبراهيمله صالحڭ مكتوبلرى، بنى فوق العاده مسرور أيلدى، بيڭ بارك اللّٰه. او ايكى قارداشمز، او حواليدهكى أهمّيتلى قارداشلريمزى زيارت ايدوب صحّت و سلامتلرينى يازدقلرى گبى، قرهدڭز ساحللرنده اوردو، سينوب، گرزه، آيانجق، بارطين، زونغولداق گبى يرلر نورلرله منوّر اولدقلرينى و إستانبولڭ اسكدار طرفندن نورجى واعظ خواجهلر نوره چاليشدقلرينى و گرزهدن مهمّ بر تجّار و غايت نورلره مشتاق و نورلره تام چاليشمغه عزم ايدن بر يڭى قارداشمزڭ گوزل مكتوبنى آلدق. إبراهيمله صالحى و او ذاتى چوق سلاممزله برابر تبريك ايدييورز، موفّقيتلرينه دعا ايدييورز.
رابعًا: أعلا مسجد إمامى فعّال قارداشمز إبراهيم أدهمڭ كندى سيستمنده تام نورجى اولارق بولديغى واعظ على شنتوركڭ و واعظ عثمان نورينڭ صميمى و فداكارانه و نور خدمتنده عزمكارانه مكتوبلرنده آرزو ايتدكلرى طرزده خاص شاكردلر دائرهسنده قبول اولمشلر. جنابِ حق اونلرى موفّق أيلهسين، آمين! على شنتوركڭ مكتوبنده إسمى بولونان مفتئِ بلده على رضايه پك چوق سلام ايدوب على رضا نامندهكى چوق أهمّيتلى قارداشلريمزڭ ايچنده نور دائرهسنه گيرديگنى و چوقلره حسنِ مثال اولاجغنى تبليغ ايديڭز. عمومه بيڭلر سلام.
* * *