شاكردلرينه قناعتِ قطعيه ويرن، «إشاراتِ قرآنيه» و «إخباراتِ غيبيۀِ عَلويه و غوثيه»نڭ، بو عصرده رسالۀِ نورڭ أهمّيتنه و مقبوليتنه إمضا باصمالريدر.
أوت عدليهلر حقوقلرى محافظه ايتمك و حقسزلرى تجاوزدن طورديرمق، وظيفهلرى اولمق جهتيله؛ رسالۀِ نورڭ يوز رسالهسى، يگرمى سنهده يوز بيڭ آدمڭ سعادتلرينه خدمت ايتديگى ثابت اولمقله برابر؛ اون سنهدن بَرى، ايكى محكمه و مركزِ حكومت و بر قاچ ولايتڭ ضابطهلرى و دڭزلى محكمهسى مناسبتيله طوقوز آى بتون محرم و غيرِ محرم أوراقلريمزده و رسالهلرده ملّته و وطنه بر ضررلى مادّهيى و موجبِ جزا بر ياڭليش گورمديگندن، ألبته رسالۀِ نورڭ بو وطنده غايت كلّى و بيوك حقوقى وار. بو كلّى و چوق أهمّيتلى حقوقى نظره آلمايوب، عادى أوراقلر گبى مصادره ايدهرك، ملّته و تقويۀِ ايمانه محتاج بيچارهلره پك بيوك بر حقسزلغى نظره آلمامق و عادى بر آدمڭ جزئى و كوچك بر حقّنى أهمّيتله نظره آلمق؛ عدليهنڭ ماهيتنه و عدالتڭ حقيقتنه هيچ بر جهتله ياقيشماز، دييه سزه خاطرلاتييورز.
دوقتور دوزينڭ وسائر زنديقلرڭ أثرلرينه ايليشمهمك، رسالۀِ نوره ايليشمك، غضبِ إلٰهينڭ جلبنه بر وسيله اولابيلير دييه قورقويورز. جنابِ حق سزه إنصاف و مرحمت و بزه ده صبر و تحمّل إحسان أيلهسين. آمين!
غيرِ رسمى، فقط تجريدِ مطلقده
سعيد النورسى
* * *