گوسترييور كه، إن شاء اللّٰه سكّۀِ غيبيه مدرسۀِ نوريهده پارلاق بر طرزده چيقهجق و گوزل فتوحات ياپاجق.
* * *
قهرمان طاهرينڭ گوندرديگى قيصه مناجات، صحّتليدر. فقط يالڭز باشدهكى قسمڭ ترجمهسى وار. شيمدى تام ترجمه ايتمگه حالم مساعده ايتمييور، عينًا يازيلسين. بو قيصهجق مناجات گوسترييور كه؛ أنانيتِ نفسيه و حسّياتِ حياتيه، رسالۀِ نورڭ تأليفى زماننده حكم ايتمهمشلر، نورلرڭ إخلاص و صافيتنى بولانديرمامشلر. أسكى حربِ عموميده دائما شهيد اولمغه منتظر اولديغمدن، إشارات الإعجاز تفسيرى تام خالص يازيلديغى گبى؛ بو مناجاتدهكى تام رابطۀِ موتڭ قوّتلى تظاهرى دخى، نورلرڭ صافى و خالص بر ماهيت آلماسنه وسيله اولمش. إن شاء اللّٰه حسّياتِ نفسانيه قاريشمامش.
* * *
نورلرڭ برنجى مدرسهسى اولان و بن روحًا چوق علاقهدار اولديغم بارلانڭ أهمّيتلى گنج شاكردلرندن، عينًا دڭزليدن بڭا گلن أحمد گبى، محمد گبى بر أحمد و محمد بورايه گلديلر كه؛ او أسكى زمانده أڭ زياده علاقهدار اولديغم و بڭا سكز سنه صداقتله خدمت ايدن مهاجر حافظ أحمد، مصطفى چاوش حسابنه؛ مرحوم مصطفى چاوشڭ مخدومى أحمد مرحوم پدرى حسابنه؛ و بَرْبر محمد ايسه، قاين پدرى مرحوم مهاجر حافظ أحمد بدلنه و بارلادهكى نور شاكردلرى نامنه يانمه گلديلر. حقيقةً بن بارلايه و او زمانه گيتمش قدر سَويندم. ما شاء اللّٰه بارلا، برنجى مدرسۀِ نوريه اولديغنى حسّ ايتمگه باشلامش. جدّى بر