برنجى توافق: حقّمده توجّهِ عامّهيى قيرمق ايچون بر يوز باشى بڭا قارشى بش وجهله قانونسز حقارت و إهانت ايتديگى عين زمانده، بلكه عين ساعتده، يوز دانه بويله يوزباشيدن أهلِ حقيقت نظرنده داها أهمّيتلى و رسالۀِ نورڭ أركانندن بر قارداشمز، بو يڭى مكتوبى، حدّمدن يوز درجه زياده إحترام ويروب او گبى إهانتلرى هيچه اينديرهرك يازمش. هم شاكردلرڭ أركانِ مهمّهسندن درت ذات، عين مسئلهيه إشتراك ايدوب إمضا باصمشلر. بن ده بو غريب توافقڭ خاطرى ايچون، مسلگمه مخالف اولان ثناكارانه مكتوبى قبول ايدوب تعديل ايدهرك لاحقهيه گچيردم و سزه ده مسودّهسنى گوندردم.
ايكنجى توافق: بن گيجه عصاىِ موسى رسالهسنى يازانلرى دوشوندم و يڭى مكتوبلرده او نقطهده بحث آرادم. بو آغير قيشده و آرا صيره بڭا منافقلرڭ ايليشمهلرى، بونلره فتور ويرمك إحتمالى وار. بو يازيجيلره بر قامچئِ تشويق لازم. ناصلكه حسن فيضى و خليل إبراهيمڭ أديبانه ايكى تعريفنامهلرى چوقلرى يازىيه شوق ايله سَوق ايتديلر دييه بر تشويق وسيلهسنى آرادم؛ بردن، صباحده بنم ئولوممى موضوع ياپان و شاكردلرى قورقوتان و سعىده و يازيده عجله ايتمهلرينه مدار او مكتوبى آلدم، ديدم: إبراهيم خليلڭ صداقتى، كرامت درجهسنه چيقمش.
ثانيًا: فيضى و أمينڭ مكتوبى، بنم چوق أنديشهلريمى إزاله ايتدى. أوت بو ايكى قارداشمزڭ صداقتلرى و خدمتلرى و رسالۀِ نوره صحابتلرينڭ چوق أهمّيتى وار. و حپسخانهده طوقوز آيده، طوقوز سنه قدر قيمتدار خدمت ايدن حلمى و صادق و إحسان و بشقارداش نامنده رسالۀِ نوره قلميله چوق خدمت ايدن إختيار تحسين گبى و فيضى و أمينڭ مكتوبنده إشارت ايديلن عموم او جوارده چوق علاقهدار اولديغم قارداشلريمڭ خدمتِ نوريهده دواملرى، بنى سرورله آغلاتديردى.