فوق العاده توجّهلرى و عموم مملكتده سزڭ شرفڭزى نشر ايتمهلرى و أهلِ حقيقتى سزه دوست ياپمقلرى جهتيله؛ بندن زياده رسالۀِ نور و شاكردلرينى حمايه و محافظه ايتمك و أهلِ سياستڭ و بنى زهرلهين دشمنلريمڭ دسيسهلرندن قورتارمق ايچون غايت درجهده بر إحتياط، تام بر صداقت و بنم يرمده تام بر دقّت ايله مكلّفسڭز. يوقسه آز بر خطا، يالڭز بڭا دگل، بلكه بيڭلر معصوم شاكردلره و شيمدى پارلايان شرفڭزه طوقونهجق. بنم وضعيتم و ويريلن صيقنتيلر آلتى وجهله قانونسز اولماسندن، ايلريده مسئوليتدن قورتارمق ايچون إنصافسز و قانونسز بنى تعذيب ايدنلر، كنديلرينه بر بهانه، بر وسيله آرايورلر. پك چوق دقّتلى اولماڭز لازمدر.
* * *
عزيز، صدّيق قارداشلرم!
أوّلا: بر ايكى گون أوّل حسبحالڭ بر پارچهسى سزه گوندريلمش. تا، سز اونى أساس طوتوب، لزوم اولديغى زمان يا إستدعا ويا او وكيله و محكمهيه ويرمك ويا باشقه مقاماته او پارچه ايله مراجعت ايتمك و قارداشلريمز دخى او أساس اوزرينه كنديلرينى منافقلره قارشى مدافعه ايتمك ايچون سزه گوندريلمش. ديمك، شيمدىيه قدر بڭا غرضله إشكنجهلى صيقنتيلرى ويرديرن، أڭ باشده او ايمش. هر نه ايسه.. سز مشورتله نه لازمسه ياپارسڭز. فقط إحتياطله، تلاشسز، ولوَلهيه ويرمهمك لازم.
ثانيًا: بو دفعه گوروشمديگم بورانڭ قورقاق مفتيسى واسطهسيله، خلوصينڭ قارصدن بر مكتوبنى برادرزادهم نهادڭ مكتوبيله آلدم. الحقّ او قارداشمز، دائما فوق العاده صداقتنى و نورلره قوّتلى علاقهسنى محافظه ايدييور. معنيدار بر توافقدر كه،