(يگرمى سنهدر غيرِ رسمى، هم حپسِ منفرد، هم تجريدِ مطلق ايچنده بولونديغى و سببسز أوهام يوزندن أمثالسز تضييق گورديگى حالده سكوت ايدن بر بيچاره ايله رسمى دگل، حقيقى و جدّى گوروشمك ايسترسهڭ آز سزڭله قونوشهجغم.)
أوّلا: ايكى سنه، ايكى محكمه، يگرمى سنه حياتمڭ أثرلرينى، مكتوبلرينى تدقيقدن صوڭره، إداره و آسايش عليهنده هيچ بر مادّه بولونمديغنه و بولمادقلرينه دليل؛ محرم و غيرِ محرم بتون كتابلريمى برائتمله برابر إعاده ايتمهلرى جرح ايديلمز بر حجّتدر، بر سنددر.
يگرمى سنهدن أوّلكى حياتم ايسه، بو وطن و ملّت لهنده فداكارانه صرف اولونديغنه دليل، أسكى حربِ عموميده گوڭللى آلاى قوماندانى اولارق باش قوماندانڭ تقديراتى آلتنده خدمتلرمله و حركاتِ ملّيهده فوق العاده خدمتمى آنقرهدهكى حكومت رئيسلرى تقدير ايله و مجلسِ مبعوثان بنى اوراده گورمكله آلقيشلاماسيدر. ديمك بو يگرمى سنهده بڭا ويريلن عذاب، بتون بتون قانونسز و كيفى بر معاملهدر. بو يگرمى سنه قرق بايراممى منزوى، يالڭز گچيردم. آرتيق يتر! قبر قپوسندهيم، بنى دنيايه باقديرمايڭز.
هم أمنيتِ عموميه رئيسى اولديغڭز جهتله، بنم خدمتمه طرفدار اولماڭز لازم. چونكه محكمهلرجه ثابت اولديغى گبى، رسالۀِ نورڭ درسلرى، دنيايه باقديغى وقت بتون قوّتلريله آسايشڭ تمللرينى محافظه ايتمك، قورومق و فساد و إختلاللرڭ اوڭنى كسمك اولماسندن، قدسى و معنوى إنضباط قوميسرلرى حكمنده اولديغنه دليل، اوچ ولايت ضابطهلرينى إشهاد ايدهبيليرم. رسالۀِ نورڭ درسنى ايشيدنلر، پوليسدن زياده آسايشه خدمت ايتدكلرينى أهلِ إنصاف ضابطهلر آڭلامشلر.