واللّٰه، أزلدن بونى بن أيلدم أزبر

رسالۀِ‌ النوردر واللّٰه او صوڭ مجدّدِ أكبر

يوزلرجه سند، هم نيجه يوزلرجه إشارت

أيلر بو مقدّس قوجه دعوايه شهادت

أڭ باشده گلن شاهدِ عدل حضرتِ قرآن

گوسترمش عيانًا اوتوز اوچ يرده او برهان

(يَا مُدْرِكًا) نڭ قلبنه گوممش أسد اللّٰه

چوق سرّ كه، بيلنلر اولويور هپ سڭا آگاه

(كُنْ قَادِرِىَّ الْوَقْتِ) ديمش اول پيرِ معظّم

بيڭلرجه ولى هم ينه ياپمش بوڭا بيڭ ضم

معجزدر او سوز، حقدر او ئوز، گورمدى هر گوز

آرتق بو معمّالرى گل سن بزه بر چوز

آلتنجى سوزڭ آلدى بتون فعل و صفاتى

ويردم ده آريندم اوڭا هم ذات و حياتى

مفلس و فقير بكله‌يوردم شيمدى قپوڭده

توحيده ايريشدير بنى، گل واريڭى صون ده

بن بن دييه يازدمسه ده سنسڭ ينه اول بن

هيچدن نه چيقار، هم بڭا بنلك ينه سندن