گرك بو درسه، گرك رسالة النور ايله ويريلن درسلره، قرآندن إستنباط بيورهرق گوسترديگى حقيقتلره قارشى اللّٰهڭ توفيقيله جان و دلدن بلى ديدم، تصديق ايتدم. و بڭا بويلهجه حقيقت درسنى ويرن بو ذاته ده عمرمده ايلك دفعه اولارق استاد ديدم. خطا ايتمدم، إصابت ايتدم.
خلوصى
* * *
بو كرّه إرسال بيوريلان مكتوبات النور ذيللرى، أمثالى گبى خوش، گوزل و بديعدر. أثرلرڭ نور إسمِ عظيمنڭ تجلّيسى اولديغنه، إحتياجه و حالِ عالمه گوره يازديرلديغنه بنجه أصلا شبهه قالمامشدر. بونى كوچك بر مثال ايله تأييد ايتمك ايسترم. ملحدلر چوق ايلرى گيدييورلر. مثلا:...... إلى آخر.
ايشته بو أحمقلرڭ هذياننه و هر نوع إغفاللرينه و ظاهرًا سوسلى لافلرينه قانميهرق، ايمان و إعتقادلرنده ثابتقدم اولمالرى ايچون أربابِ ايمانه قوّت و زمرۀِ طغيانه قهر و شدّتله درسِ عبرت ويرهجك پك مناسبتلى سوزلر، موضوع بحث آثارده عيان بيان گورولمكدهدر.
حيفا كه، بو نورلر شيمديلك (حاشيه) لِحكمةٍ پك محدود ساحهده و آنجق مؤمنلر ايچنده نشر ايديلهبيلير.
﴿اَلصَّبْرُ مِفْتَاحُ الْفَرَجِ ۞ اِنَّ اللّٰهَ مَعَ الصَّابِرٖينَ﴾
خلوصى
* * *
___
(حاشيه): بوندن اوتوز بش سنه أوّل.