دانهسنى آلان إنصاف ايله اوقورسه، حقّى تسليمه و منكِر ايسه گيتديگى يولى تركه، فاسق ايسه توبهيه مجبور اولاجغنه قطعيًا اميدوارم.
خسرو
* * *
(شو فقره رأفت بگڭ مكتوبندندر)
سوزلريڭز مرشدانه و چوق يوكسك اولديغندن غايت دقّتلى و تحليل ايدهرك اوقونمق ايجاب ايدييور. سرد أيلهديگڭز دلائلِ عقليه و منطقيه او قدر طاتلى و حيرتبخشدر كه؛ إنسان اوقودقجه اوقويور و نامتناهى بر ذوقِ معنوى حسّ ايدهرك هيچ ألندن بيراقمق ايستهمييور. بو سببله بر دفعه اوقومق كافى دگل. هپسى ياننده بولونوب دائما اوقوماليدر.
رأفت
* * *
(شو فقره دخى صبرى أفندينڭ مكتوبندندر)
استادم أفنديم!
شو قيمتلى ألماسلر جنابِ حقدن حبيبِ ذىشاننه گوندريلن شجرۀِ طوبانڭ نامتناهى ثمرهلرى اولديغنى و بونلرڭ أمثالى گبى بىنظير مجوهراتڭ إخراج و تشهيرى زماننى بولوب سرگئِ ربّانيه و محمّديهيه وضع ايدن ذاتِ استادانهلرينه شو دقيقهده قاصر عقلم و إستعدادسز لسانمله شويله دعالر ايدييورم:
(اَللّٰهُمَّ احْفَظْ مُؤَلِّفَ هٰذَا الدُّرِّ الْيَكْتَا الَّذٖى هُوَ مَوْسُومٌ بِرِسَالةِ النُّورِ وَاَعْطِ قَلْبَهُ (وَقَلْبَ صَبْرٖى) اَلَّذٖى هُوَ مَمْلُوءٌ بِالْحَقَائِقِ وَالْاِبْتِهَاجِ وَالسُّرُورِ اٰمٖينَ)
صبرى
* * *