ايدهجك بر تمثيل ايشيديلمديگندن بو درجه ذهنده تقرّر و تمركز ايتمهمشدى. شو تمثيل، بسمله سوزى اولان برنجى سوزده نه قدر مصيب و معنيدار اولديغنى إنسان اولان تقدير ايدر.
صبرى
* * *
اوچ كتابدن يگرمنجى سوزى ايلك دفعه اوقودم. حبلِ متينِ إلٰهى و قانونِ مبينِ ربّانى اولان قرآنِ عظيم الشانده، شو صوڭ عصرده وجوده گلن و فرنكلرڭ مدارِ إفتخارلرى بولونان تحت البحر، طيّاره وسائره گبى أشيايه، بيڭ اوچيوز كسور سنه مقدَّم إشارتله إفاده ايديلديگنى اوگرنهرك كتابِ مبينڭ ماضى و مستقبلدن ويرمكده اولديغى إخباراتِ غيبيه و صادقه و بياناتِ خارقه، دوست و دشمنى مفتون و حيرتلرده بيراقديغى جهتله، بر قات داها إعجازِ قرآنى إثبات و تأييد ايتمشدر. يگرمى اوچ و اوتوزنجى سوزلرڭ باش طرفلرندن اوچر، بشر صحيفه اوقويهبيلدم. مخزن و مدفنِ مجوهراته راست گلمش بر فقير گبى هانگى جوهرى آلاجغمى حريصانه دوشونويورم.
صبرى
* * *
بحرِ معجزات، فخرِ كائنات أفنديمز حضرتلرينڭ شو سيسلى عصرده پاسلى روحلريمزى تنوير و تسرير ايدن و سائقِ حياتِ أبديهلرى بولونان اون طوقوزنجى مكتوبڭ بشنجى جزئنى آلارق، اوچنجيسنى إعاده ايتدم. فخرِ كائنات أفنديمزڭ معجزاتندن اولان پارمقلرندن صو آقيتهرق اوردويه ايچيرمهسنه دقّت ايدهرك درين بر تفكّره طالدم. او صيرهده قلمم بويا شيشهسنده ايدى. يازمق وظيفهمه موقّت بر فاصله ويرهجكدم. قلممى طوتدم، مركّبى ايله يرنده قويمامق ايچون قلمدهكى مركّب بيتنجهيه قدر بر ايكى كلام داها يازايم ده اويله بيراقهيم ديدم. باشلادم،