اون آلتنجى مكتوبى آتابگه گيدركن گوتوردم. أكثرى نقطهلر بر قسم إخوانى آغلاتدى و عموجهزادهم زهدى أفندى، اون آلتىيى اوقوينجه، «شيمدىيه قدر بيلمديگم و گورمهديگم نورانى و پك كثرتلى سرورِ معنوىيى إحتوا ايدن بر پنجره بوگون قلبمده آچيلدى. شو پنجرهدن حاصل اولان نتائجى يازمق إقتداريمڭ فوقنده ايسه ده، عونِ إلٰهىيه طايانهرق بر عريضه ايله عرض ايتمك أخصِّ أملمدر. نهايتسز سلام و حرمتلريمى تبليغه توسّطڭزى رجا ايدرم.» ديديلر.
صبرى
* * *
گوڭل ايستر كه، همان رسالة النورڭ عمومنى يازيويرسهم ده ماملكمده بولونان درِّ يكتالرى إستعدادم نسبتنده مطالعهيه باشلاسهم.
اوتوز برنجى ألماس كلّياتنى عونِ حق و عنايتِ أكرميلريله ايكى گون أوّل إكماله موفّق اولدم. أحمد قارداشمه عائد دركنارى تفهيم ايتدم. برآز اوقور و اوننجى سوزى ايستهيور، فقط بو سوز قيمتِ معنويه إعتباريله موجوداتدن آغيردر. إعجازِ قرآنڭ ايكنجى جزئنى همان ختام بولديرمق اوزرهيم. فقط مشتاق بولونديغم اوتوز ايكنجى سوزى دخى لطف بيوراجق اولورسهڭز، حاصل اولاجق ممنونيتمى بر وجهله عرض ايتمكدن عاجز قالاجغم. چونكه بو گبى قيمتدار و معنيدار أثرلرى ايشيتدكدن صوڭره، گورمك إشتياقى گيتدكجه آرتييور و بو طبيعتدن بر درلو كنديمى منع ايدهمييورم.
صبرى
* * *