ناديده و خوشبو أزهارِ لطيفه گوناگون بولونوب ده، هانگيسنى قوپارمغه، قوقلامغه، ترجيح ايتمگه متحيّر قالوب ده، نتيجهده هپسندن بر دسته، بر دَمَت ياپمغه قرار ويرديگى گبى؛ بو رسالۀِ شريفهلر ده يازانى، اوقويانى، ديڭلهينى نور باغچهسنه، نور درياسنه غرق ايدوب ده متفكّر، متحيّر ايدوب، هپسندن بر چيچك دَمَتى ياپماز ده نه ياپار؟ إنسانى، فقط او إنسانى تحيّر و تفكّر صحراسنده مستِ لايعقل بيراقماز ده نه ياپار؟ بتون دنيوى بشريت و حيوانيت خاصّهلرندن تجرّد ايتمهسنه، خالقنه عبوديتِ متماديهده بولونماسنه، مذموم بِالجمله أخلاقلرى دفع و طرد ايتمهسنه إلخ... گبى حسّياتيله متحسّس ايدوب ده نفسِ أمّارهيى ئولديرمز ده نه ياپار؟
دييهبيليرم كه، بو نور رسالۀِ شريفهلرى بر گلستانِ جناندر. بو گلستاندن إستفاده ايدهمهين بدمايهلره، نصيبهدار اولاميانلره صد هزار تأسّف. ايشته او گبيلره إلهامِ ربّانى ايريشسين ده، يگرمى اوچنجى سوز رسالۀِ شريفهسنڭ آخرندهكى ايكى لوحهنڭ برنجيسى كه، حجابِ غفلتدن نهانى، ايكنجى لوحهدهكى زوالِ غفلتله عيانه تبديل ايدهبيلسينلر.
جمله مؤمنينِ موحّدينڭ طريقِ هدايتده خطوهأنداز اولمالرى ايچون؛ جنابِ واجب الوجود حضرتلرينه قَولاً دعا و تضرّع ايتمكلگم و فعلاً ده هنوز درتده برينى يازاماديغم بو نور رسالۀِ شريفهلرينڭ فقيرده موجود اولانلرينى، إعتماد ايتديگم، محبّت و عشقى اولديغنى حسّ ايتديگم إخوانه، أزجمله (......) گبى ذواتِ محترمه، جمعه گونلرى فقيرخانهده طوپلانلديغى وقت، بِالذّات اوقويور و أللرينه برر نور پارچهلرندن ويروب آقشامه قدر و بعض گيجهلرى اوقونمقده دوام ايديلييور. هپمز جنابِ قادرِ قيّومه عبوديت و نيازيمزى ايفا ايدييورز و ذاتِ استادانهلرينه قارشى ده، بو بورجمز اولان دعاىِ استادانهلرينى ياد و تذكار ايدييورز.