اونلر جانله باشله سزه منّتدار و متشكّردرلر. بوگون صاچمقده اولديغڭز فيضلى نورلر، بشريتڭ حقيقى إنسان اولانلرينى پايانسز سرورلره إستغراق ايدهرك، مكلّف اولدقلرى وظائفى بيلديرييور. خدمتڭز إنكار ايديلمز و سنڭ فداكارلغڭ عظيمدر، عظيمدر.
عزيز استاد! خدمتڭ گوكلرده گزسين (حاشيه) و سز دستانلرده گزيڭز. فداكار استاد! ديانتدن مدد آلميان، أهلِ غفلتڭ غفلتنى زيادهلشديرن أدبيات دينيلن مدهش سرخوشلق، آنجق و آنجق سزڭ آثار و تلقينلريڭز سايهسنده مندفع اولويور. دينسز ملّتلر پايدار اولاميهجغى و حتّى إنسانيتى بيله اوگرنهمدن دنيادن گلوب گچهجكلرينى پك معقول و منطقى دليللرله إثبات ايتدڭ. أثرلرڭ روحڭ گبى علوى و إحاطهلى.
سَوْگيلى استادم! مستريح اولماليسڭز كه، سزڭ سعيڭز بيهوده دگلدر. لا يموت رسالهلرڭ إلَى الأبد قيمتلى أللرده گزهجك. بوگونكى دينسزلره حدّينى بيلديرهجك و بلكه ايمان دخى بخش ايدهجك. ذاتًا سزڭ طلبڭز بو دگل مى؟ أملڭز، غايهڭز، ايمان دائرهسنده ايقاظ و إرشاد هدفلرينه يتيشمك دگل مى؟
___
(حاشيه): بو قارداشمڭ بو حسّنه إشتراك ايتمييورم. رضاىِ إلٰهى كافيدر. أگر او يار ايسه، هر شى ياردر. أگر او يار دگلسه، بتون دنيا آلقيشلاسه بش پاره دگمز. إنسانلرڭ تقديرى، إستحسانى، أگر بويله ايشده، بويله عملِ اُخرويده علّت ايسه، او عملى إبطال ايدر. أگر مرجّح ايسه، او عملدهكى إخلاصى قيرار. أگر مشوِّق ايسه صفوتنى إزاله ايدر. أگر صِرف علامتِ مقبوليت اولارق، ايستهميهرك جنابِ حق إحسان ايتسه، او عملڭ و علمڭ إنسانلرده حسنِ تأثيرى نامنه قبول ايتمك گوزلدر كه، (وَ اجْعَلْ لٖى لِسَانَ صِدْقٍ فِى الْاٰخِرٖينَ) بوڭا إشارتدر.
سعيد