(رأفت بك و خسرو گبى رسالۀِ نور شاكردلرينڭ رسالۀِ نور بركتنه إشارت ايدن بولدقلرى لطيف بر توافقدر)
رسالۀِ نورڭ إسپارطهيه نه درجه رحمت اولديغنه دلالت ايدن بر توافقِ عجيبه:
رسالۀِ نورڭ مظهر اولديغى عناياتڭ كلّيتندن مهمّ بر فردى ده شودر كه: إسپارطه ولايتى سكز سنهدن بَرى رسالۀِ نورڭ مؤلّفنى سينهسنده صاقلامشدى و بارلا گبى شيرين بر ناحيهسنده (جنابِ حقّڭ لطف و كرميله) محافظه ايتمشدى. بو مدّت ظرفنده يواش يواش إنتشار ايدن رسالۀِ نوردن إسپارطهده بيڭلر آدم ايمانلرينى تقويه ايتديلر. بِالخاصّه گنجلر پك چوق إستفاده و إستفاضه ايتديلر.
وقتا كه، استاديمزڭ بارلا گبى لطيف و شيرين بر محلدهكى صيقنتيلى و پك آجيقلى و أڭ قاتى قلبلرى آغلاتان إشكنجهلى أسارتى بيتدى. رسالۀِ نورڭ مؤلّفى اولان استاديمزڭ نظرى جنابِ حقّڭ عونيله إسپارطهيه متوجّه اولدى. أوهامه دوشن بعض ظالم أهلِ دنيانڭ تشبّثكارانه حركاتِ ظاهريهسى بر سببِ عادى اولارق يڭى بر ظلمه هدف اولدى. استاديمز إسپارطهيه گتيريلدى.
فقط استاديمزڭ تشريف ايتديگى زمان، ياز موسمنڭ أڭ حرارتلى زمانى ايدى. ياغمورلر كسيلمش، إسپارطهيى إسقا ايدن صولر آزالمش، بر قسمِ مهمّنڭ منبعى كسيلمش؛ آغاجلر صارارمغه، اوتلر قورومغه، چيچكلر بوروشمغه باشلامشدى.
رسالۀِ نورڭ أڭ زياده إنتشار ايتديگى محل إسپارطه ولايتى اولديغى ايچون رسالۀِ نور حقّندهكى عناياتِ ربّانيهيى پك ياقيندن مشاهده ايدن رسالۀِ نور شاكردلرى اولان بزلر، مهمّ بر واقعهيه داها شاهد اولدق.