قوّتمله يازمغه قرار ويردم. بنم گبى يارهلى قارداشلريمه، بتون مسلمانلره، بتون قوّتمله باغيرييورم: «أيواه! بو عصريمزده، بو يارهلر ايله ناصل إستراحت ايدهبيليرز، يوقسه!.. بو عصرڭ معنوى دوقتورى و علاجلرى ايسه، قرآندن ترشّح ايدن رسالۀِ نور و مكتوبات النوردر. اونلره صيقى صاريلالم.»
عاجز طلبهڭز
على علوى
* * *
(قلهاوڭى قريهسندن إبيش اوغلى محمدڭ بر فقرهسيدر)
محترم استادم أفنديم!
قارداشم مصطفى، رسالهلرى يازمغه باشلايالى بش سنه اولدى. مع الأسف ايكى سنهسنى ضايع ايتدك. اوچ سنهدن بَرى، رسالهلرى سائر آرقداشلرله برابر، خدمتمزڭ خارجنده هر زمان اوقويوب إستفاده ايدييورز. بعض، كويمزڭ أهلِ طريقت اولانلرى، بدايةً قارداشم مصطفىنڭ اوقوديغنه أهمّيت ويرمييورلردى.
بن ده بو اوقونان سوزلر هم طريقته، هم حقيقته پك موافقدر. بو زمانڭ يارهلرينه بر علاجدر دييوردم. و هر نه زمان يأس ايچريسنده قالسهم قارداشمڭ ياننه گلير، ايشيتديگم حقيقتلرى رسالۀِ نوردن اوقوتور، ديڭلر و رسالۀِ نورڭ ويرديگى فيضله يارهلرم تداوى اولور، گيدردم. هر هانگى بر مسئلهدن بحث ايديلسه، رسالۀِ نورده أڭ اييسى واردر. يالڭز چوق إنسانلر وار كه، سوزلرڭ قيمتنى بيلمييورلر. بن ده؛ بتون بو سويلهنن سوزلره علاج، رسالهلرده واردر دييورم. اولانجه قوّتمله كُرۀِ أرضه باغيرارق ديرم كه: «خارجده گورولن مرضلره علاج واردر.»