اون ايكنجى إشارت: محدود گناهلره جهنّمله مقابلهنڭ محضِ عدالت اولديغنه، جهنّمڭ جزاىِ عمل، جنّتڭ فضلِ إلٰهى ايله اولديغنه؛ سيّئهنڭ آز يازيلوب، حسنهنڭ چوق يازيلماسنه؛ أهلِ ضلالتڭ موفّقيتلرينڭ، (حاشا) كنديلرنده حقيقت اولديغنه ويا أهلِ حقده ضعف بولونديغنه دلالت ايتمديگنى گوسترن درت مراقلى سؤاله غايت فصيح و بليغ جوابلر ويرمك صورتيله، أهلِ ايمانى، (رَاْسُ الْحِكْمَةِ مَخَافَةُ اللّٰهِ) دستورينه، هر درلو سعادتى جامع اولان قرآن و سنّت شاهراهنه گيرمگه تشويق ايتديگنى،
اون اوچنجى إشارت: اوچ نقطهسيله، شيطانڭ دسيسهلرينه مبتلا اولان بيچاره إنسانه، حياتِ دينيه، حياتِ شخصيه و حياتِ إجتماعيه سلامتى و صحّتِ فكر و إستقامتِ نظر و سلامتِ قلب ايچون محكماتِ قرآنيه ميزانلريله و سنّتِ سنيه ترازيلريله أعمال و خاطراتنى طارت و قرآنى و سنّتِ سنيهيى دائما رهبر ياپ و (اَعُوذُ بِاللّٰهِ مِنَ الشَّيْطَانِ الرَّجٖيمِ) دييهرك جنابِ حقّه إلتجاده بولون، دييه چوق قيمتلى توصيهده بولونديغنى و (خِتَامُهُ مِسْكٌ) نوعندن اون اوچ إشارت حالنده تفسير اولونان سورة الناس و ايكى آيتى تكرار ايله درسه نهايت ويرديگنى، غايت ذوقلى و شوقلى و علاقهلى بر صورتده بيان و إفاده أيلهمكدهدر.
اون دردنجى لمعهنڭ برنجى مقامنى تشكيل ايدن ايكى مسئله بنجه چوق مهمدر. بو درسڭ تقرير و تحريرينه وسيله اولان رأفت بك قارداشمزدن اللّٰه راضى اولسون. ايكنجى مقام باشلى باشنه بر شاه أثردر. (بِسْمِ اللّٰهِ الرَّحْمٰنِ الرَّحٖيمِ) حقّندهكى بيان بيوريلان آلتى سرّ، اويله بر خزينۀِ أسرارِ ربّانيدر كه؛ آنجق رحمٰنِ رحيمڭ عنايتيله بو مبارك أثرى اوقويوب آڭلايانلر اوندن ذوق آلابيليرلر.