(خلوصى بگڭ فقرهسيدر)
عزيز، محترم، مشفق و مكرّم استادم!
بو دفعه إرسالنه عنايت بيوريلان رسالۀِ نور أجزالرينڭ درت قسملق فهرستهسنى آلدم. داها أوّل اوتوز برنجى مكتوبڭ اون اوچنجى و اون دردنجى لمعهلرينى آلمش، فقط إحتساسلريمى عرضه موفّق اولامامشدم. فهرستهلر درت طرفمى آيدينلاتديلر و إعتقادده بر اولوب، چوق متين حكمتلرله بعض أعمالده آيريلقلرى اولان درت مذهبِ حق گبى؛ بو فقيره حقّه، حقيقته، صدقه، ايمانه، نوره، رضايه گيدن يوللرى گوسترديلر. حادثاتِ دنيويه مشغلهسى، شيمدىيه قدر باشمدن گچمهمش بر طرزده بنى يورمش. قوجه بر دائرهنڭ مادّى و معنوى آغير يوكى آلتنده، تك باشمه قالديغمدن چوق بوڭالمشدم.
عزيز استاديمڭ اوتوز برنجى مكتوبڭ برنجى لمعهسيله توصيه بيورديغى أورادڭ قوّتى، رسالۀِ نورڭ فيضى، مشفق استاديمڭ مستجاب دعاسى و استاديمڭ استادى حضرتِ غوثڭ لِلّٰهِ الحمد أڭ كوچك حاجتمى گورهجك قدر ظاهر همّتى، محضا بر لطف و فضلِ إلٰهى أثرى اولارق دوام ايدهبيلديگم صلواتِ شريفه بركاتيله ظهور ايدن إمدادِ رسالتپناهى و جنابِ اللّٰهڭ نهايتسز إنعام و إحسان و عنايتى سايهسنده، (يوز بيڭلر حمد و شكرلر اولسون) يأسه و فتوره دوشمكدن قورتولمش.. يالڭز، حضورِ معنويڭزه بر قاچ سطرلق عريضه ايله چيقمق گج قالمشدر.
حقيقةً، ألماس قلملى چوق قيمتلى قارداشلريمڭ آثارِ نورڭ جمع و تكثير و نشرنده گوستردكلرى غيرت و همّت و سَوْگيلى استاديمزه بو قدسى وظيفهده ياپدقلرى معاونت، هر درلو تقديرڭ فوقندهدر. اللّٰه ذو الجلال جملهسندن راضى اولسون و نشرِ أنوارِ قرآنيهده دائمى موفّقيتلره مظهر بيورسون.