مكتوبڭ سكزنجى قسمندن ايكنجى رمزينه عائد مهمّ بر إعجازى ده آلدق، اوقودق. آلديغمز معنوى فيضى، بنم گبى يوقسول بر طلبهڭزڭ قلب و قلمنڭ حدّى دگلدر كه تعريف ايتسين.
قيمتدار استادم! ناصل او خالقِ ذو الجلاله نهايتسز بر منّتدارلقده بولونميهلم كه؛ عزيز استاديمزى واسطه قيلارق أڭ بيوك نعمتلرينى، پك زياده محتاج اولديغمز بر وقتده ويرييور، بزى تسلّى ايدييور. هم ممنون ايدييور، هم ده إستقبالڭ نورلى يوزينى گوسترهرك بزى او نوره قوشديرييور. بر طرفدن قارداشلريمزى چوغالتييور، محبّلريمزى تكثير ايدييور. مادّى و معنوى قوّتلريمزى تقويه ايدييور. ديگر طرفدن سعادت خزينهلرينڭ آناختارلرينى أللريمزه ويرييور.
أى عزيز استادم! جنابِ حق سزدن أبديًا راضى اولسون آمين.
أحمد خسرو
* * *
(ذكىنڭ فقرهسيدر)
بن ايستهيورم كه؛ بر آن أوّل بر يره چكيلهيم ده، مساعيدن خارج زمانلريمى، او علوى و مقدّس خزينۀِ حقيقت و آثارِ گرانبها خدمتنده دوامه باشلايهيم. فقط بوگونلك بو يوجه أملمڭ حصولندن، بِالضروره و بِالمجبوريه محروم قالييورم. هيچ اولمازسه شو گونلرده أليمده، او مطالعهسى گوڭللره و قلبلره بر صفاىِ سرمدى و جاودانى بخش ايدن كتابِ كائناتڭ برر لمعهسى و برر نورِ تمثالى اولان أثرلريڭزدن بر ايكى دانهسى أليمده بولونسه ايدى، بنم ايچون ناقابلِ تعريف بر سُرور و سعادت منبعى اولاجقدى و نه بولونماز بر نعمت، نه أله گچمز بر دفينه اولاجقدى.