«و بن ئولديگمده سزى آرقهمده وارث بيراقهرق فرح ايله كدرسز قبريمه گيرمك رحمتِ إلٰهيهدن اُميد ايدرم.» بوراسى بنى چوق دوشونديردى و هيچ بر دقيقه استاديمڭ بو آرزو، بو طلب و رحمتِ إلٰهيهدن بو اميدى، ذهنمدن و فكرمدن و قوّۀِ مخيّلهمدن هيچ چيقمييور. بناءً عليه بو فقرهيه بتون ذرّاتِ موجوديتمله آمين ديدم و جنابِ حقّڭ فضل و كرمنى تضرّع و نياز ايتدم.
بونڭله برابر (يا حضرت ريا دگل، تصنّع دگل، ايچمدن طوغويور) گوڭل شويله ايستهيور و آرزو ايدييور: بو فقير، سز استادمدن أوّل قبره گيرسين و سز دارِ بقانڭ ايلك قپوسنه گلنجهيه قدر، دارِ دنياده بولونوڭز كه؛ بو فقير و محتاج اولان طلبهڭزه آرقهسندن گوندرهجگڭز دعا و هديهڭزله متنعّم، شاد و مسرور اولسون. و سزڭ تشريفڭزده (كه أرحم الراحمين اولان ربّ العالميندن دعا و نيازم بودر) روحم سزى إستقبال ايتمك شرفيله مشرّف اولابيلمك گبى، گوڭل آرزو و حياتى حاصل اولويور (حاشيه) و چوق دوشونديرييور. و بو آرزو و نيازمدن داها بيوگى و شديدى شودر كه: استاديمڭ دارِ دنياده داها پك چوق زمانلر قالماسى، طولاييسيله وظيفۀِ قدسيهڭزڭ دوامى و حقيقت و هدايت نورلرى اولان رسالۀِ النور و مكتوبات النورلرڭ تكثيرى و إنتشاريله، خوابِ غفلتده اولانلرڭ، ضلالتده قالانلرڭ، أهلِ بدعه و ملحدلرڭ طريقِ حق و هدايته گيرمهلرى ايچون سز استاديمڭ چوق زمان داها ياشامقلغڭزى و باشمزدن أكسيك اولمامڭزى و سزڭ غيبوبتڭزله، بزلرڭ يتيم و اوكسوز قالمامقلغمزى گوڭل آرزو ايدييور.
___
(حاشيه): حقيقةً مرحومڭ مناجاتى قرينِ إجابت اولمش كه، عين ييل ايچنده استادينه بدل، محكمهده، استادينه ضرر گلمهمك ايچون "يا ربّى جانمى آل، (لَا اِلٰهَ اِلَّا اللّٰهُ)" دييهرك محكمهده وفات ايدوب إرتحالِ دارِ بقا ايتمشدر. (رَحْمَةُ اللهِ عَلَيْهِ رَحْمَةً وَاسِعَةً)
صبرى