حاوى اولديغنى، بر قات داها تصديق ايتدم. الحمد لِلّٰهِ، شو نكتهده نوره محتاج قلبمه لَا يُعَدّ نورلر بخش ايديلدى.
قلبمڭ حسّ ايدوب، لسانمڭ إفادهيه مقتدر اولامديغى درياىِ حقيقته طالارق، شو أثرِ گرانبهانڭ شايانِ مَنّ و شكران اولديغنى عرض و مابعدينڭ توالى و تماديسنى جان و يوركدن طلب و تمنّى ايتمكده ايكن، ايشته تتمّهسى اولان اوچ تلويح ده إحسان بيورولدى.
بو خاتمه قسمى، ورطهلردن قورتولمق چارهسنى گوسترن إرشاد و ايقاظلريله، جدًّا بر لوحۀِ سعادت و باعثِ حياتِ مجدّد اولمشدر. عجبا هر آن، أڭ آز بيڭ بر نوع ثمرۀِ سعادت ايله تغدّى ايتمكدن قاچان و او جادّۀِ كبرايه أصلا لايق اولميان، إفترا و إسنادات پردهلرينى گوروب، شو مشعلۀِ عديم المثالى سونديرمك، ظلمات و ضلالات واديلرينه يول آچمق ايستهين باقار كورلره، نه ديمهلى؟
نظيرسز شعلهلريله عصرِ حاضرى إحيا و تنوير و إستقبالڭ قروكيسنى بِحقٍّ تنظيم و تحكيم ايدن نورلر، إلَى الأبد پايدار اولسون. ديلرم بارئِ تعالى حضرتلرندن كه، شو آثارِ پرنورڭ بتون اُمّتِ محمّد (عصم)ه تعميمنه موفّقيت و ميسّريت إحسان بيورسون. آمين.
صبرى
* * *
(خسروڭ فقرهسيدر)
سَوْگيلى استادم أفنديم!
كنز العرش دعاسنڭ فيضندن گلن بر نكتۀِ قرآنيهده، ياڭليشلغڭ طرفمزدن ناصل قارشيلانديغنى سؤال ايدن و خطاسنڭ أسبابنى بزه ايضاح ايدن سَويملى