إمام عُمَر، كمال الدين گبى دوستلره سلام و دعا ايدييورم و دعالرينى ايستهيورم.
اَلْبَاقِى هُوَ الْبَاقِى
قارداشڭز
سعيد النورسى
* * *
مسلگمزڭ بر مدارِ شوقى و ذوقى اولان توافق لطائفندن اوچ درت نمونه:
برنجيسى: إقتصاد رسالهسى، بربرندن خبرسز آلتى مستنسخڭ يازدقلرى آلتى نسخهده، ألفلرڭ أللى اوچ عددنده توافقلرى، تأليف و إستنساخ تاريخى اولان أللى اوچه موافق گلمهسيدر. صوڭره باقدم كه، أصل مسودّۀِ اولٰىده چوق چيقينتى و تصحيحلر ايله برابر أللى اوچ عدد سرّينى محافظه ايتديگنى حيرت ايله گوردك.
ايكنجيسى: رسالهلرڭ فهرستهسى تمام يازيلدقدن صوڭره، برنجى مسوّد إختيارسز «بو گوزل فهرسته تمام اولدى» دييوب يازمش. او مسوّد حسابِ أبجدى هيچ بيلمديگى گبى، هيچ بر شى ده دوشونمهمش. «بو گوزل فهرسته تمام اولدى» عينًا بيڭ اوچ يوز أللى ايكى (١٣٥٢) تاريخنى گوستروب فهرستهنڭ تاريخِ تأليف و إستنساخنى گوسترمشدر.
اوچنجيسى: يگرمى اوچنجى لمعهنڭ مسودّهدن تبييض ايديليركن، هيچ ألفلرڭ عددينى خاطره گتيرمهدن، يازيلدقدن صوڭره يوز يگرمى سكزنجى رساله اولديغنه إشارةً يوز يگرمى سكز ألف اولماسيدر.