(١٥ شباط ١٩٣٤)
﴿بِاسْمِهٖ ۞ وَاِنْ مِنْ شَىْءٍ اِلَّا يُسَبِّحُ بِحَمْدِهٖ﴾
﴿اَلسَّلَامُ عَلَيْكُمْ وَرَحْمَةُ اللّٰهِ وَبَرَكَاتُهُ﴾
عزيز، صدّيق، دقّتلى قارداشم رأفت بك!
أوّلا: اوننجى سوزڭ برنجى إشارتنڭ آخرنده، «أوت، بر شيدن هر شيئى ياپمق و هر شيئى بر تك شى ياپمق هر شيئڭ خالقنه خاص بر ايشدر.» شو جمله هم يگرمى ايكنجى سوزڭ لمعهلرنده، هم اوتوز اوچنجى مكتوبڭ پنجرهلرنده، هم يگرمنجى مكتوبڭ اون بر كلمهلرنده ايضاح و إثبات ايديلمشدر. بورادهكى كلّيت نسبى و عرفيدر. «بر شيدن هر شيئى ياپمق»دهكى مراد، بتون دنيانڭ موجوداتنى بر شيدن ياپمق و ايجاد ايتمك دگلدر. بلكه اوندهكى مراد؛ بر شيدن يعنى بر قطره صودن، بر إنسانڭ، بر حيوانڭ هر شيئنى، هر أجزاسنى، هر بر جهازاتنى خلق ايدييور و بر شى اولان طوپراقدن نباتات و حيواناتڭ هر بر شيلرينى اوندن خلق ايدر ديمكدر. هم «هر شيئى بر تك شى ياپمق» جملهسندهكى كلّيت مقيّددر، نسبيدر. يعنى إنسانڭ يديگى هر نوع طعامدن، او إنسانده بسيط بر جلد و بر قان و بر أت و هكذا...
الحاصل: بو كلّيتدن مقصد اودر كه؛ بر شيئى چوق مختلف أشيايه چويرمك و بر چوق مختلف أشيايى ده بر تك شى ياپمق، آنجق خالقِ كلِّ شيئه مخصوصدر.
ثانيًا: منهاج السنّهيى كندى خطّڭله يازديغڭه چوق ممنون اولدم. سنڭ قلمڭ مرحوم عبد الرحمانڭ قلمى گبى بڭا شيرين گلييور.