هر نه ايسه... بن سندن شيمدى چوق ممنونم و اورادهكى قارداشلرم دخى سندن چوق ممنوندرلر. جنابِ حق بزى و سزى طريقِ حقده خدمتِ قرآنيهده ثبات و متانتى ويرسين، آمين. قاين پدريڭز حاجى إبراهيم أفندىيه چوق سلام ايله بدر الدينه و همشيرهمه چوق دعا ايدييورم.
اَلْبَاقِى هُوَ الْبَاقِى
قارداشڭز
سعيد النورسى
* * *
﴿بِاسْمِهٖ سُبْحَانَهُ ۞ وَاِنْ مِنْ شَىْءٍ اِلَّا يُسَبِّحُ بِحَمْدِهٖ﴾
﴿اَلسَّلَامُ عَلَيْكُمْ وَرَحْمَةُ اللّٰهِ وَبَرَكَاتُهُ﴾
عزيز، صدّيق، غيّور قارداشم!
سليمان أفنديدن آڭلادم كه، بعض خصوصى مشكلاته معروض اولويورسڭ. سزڭ گبى متين إنسانلره صبر توصيهسى زائددر. خدمتڭ قدسيتى و او خدمتدهكى ذوق و غيرتڭدهكى شوق، او آجى خصوصى مشكلاته قارشى گلير و غلبه ايدر تخمين ايدييورم. ممكن اولديغى قدر آلديرمهمليسڭ. قيمتدار، قصورسز بر مالڭ دكّانجيسى مشتريلره يالوارمغه محتاج دگل. مشترينڭ عقلى وارسه او يالوارسين.
﴿خَيْرُ الْاُمُورِ اَحْمَزُهَا﴾
سرّنجه عظيم خيرلرڭ مشكلاتى چوق اولويور. مشكلات چوغالدقجه أهلِ همّت فتور دگل، غيرت و ثباتنى زيادهلشديرر. إن شاء اللّٰه سز ده اويله متين و ثباتكارلردنسڭز.
اَلْبَاقِى هُوَ الْبَاقِى
قارداشڭز
سعيد النورسى
* * *