ايشته سماوات و أرضڭ ربّى، او شمس الشموس و شعرىنڭ خالقى خطاب ايتديگى وقت، او سماوات و أرضڭ أجرامنه و عالملرينه باقان قدسى كلامنده او أيّاملرى ذكر ايدر و ذكر ايتمهسى غايت يرندهدر.
مادام أيّامڭ لسانِ شرعيده بويله إطلاقاتى واردر. علمِ طبقات الأرض و جغرافيا و تاريخِ بشريت علماسنجه نوعِ بشرڭ يدى بيڭ سنه دگل بلكه يوز بيڭلر سنه گچيرديگنى تسليم ده ايتسهك، آدمدن قيامته قدر عمرِ بشر يدى بيڭ سنهدر اولان روايتِ مشهورهنڭ صحّتنه و بيان ايتديگمز آلتى بيڭ آلتى يوز آلتمش آلتى سنه نورِ قرآن حكمفرما اولديغنه منافى اولاماز، جرح ايدهمز. چونكه أيّامِ شرعيهنڭ درت ساعتدن أللى بيڭ سنهيه قدر حكمى و شمولى وار. فقط نفس الأمردهكى أيّامڭ حقيقتى او روايتِ مشهورهده هانگيسى اولديغى شيمديلك بو دقيقهده قلبمه إنكشاف ايتديريلمهدى. ديمك او سرّڭ إنكشافى مناسب دگل.
اوچنجى أساس:
﴿لَا يَعْلَمُ الْغَيْبَ اِلَّا اللّٰهُ﴾
شو مسئلهده شيمديلك دليلنى گوسترهميهجگم بر مدّعايى بيان ايدييورم. شويله كه: شو دنيانڭ بر عمرى و شو دنيادهكى كُرۀِ أرضڭ دخى اوندن قيصه ديگر بر عمرى و كُرۀِ أرضده ياشايان نوعِ إنسانڭ داها قيصه بر عمرى واردر. بو بربرى ايچنده اوچ نوع مخلوقاتڭ عمرلرى، ساعتڭ ايچندهكى دقيقه، ثانيه، ساعتلرى صايان چرخلرڭ نسبتى گبيدر. نوعِ إنسانڭ عمرى، كُرۀِ أرضڭ ايكى حركتيله حاصل اولان معلوم أيّام ايله اولديغى گبى؛ ذىحياتڭ وجودينه مظهر اولديغى زماندن إعتبارًا كُرۀِ أرضڭ عمرى ايسه مركزِ إرتباطى اولان شمسڭ حركتِ محوريهسيله حاصل اولان أيّام ايله اولماسى حكمتِ ربّانيهدن اوزاق دگلدر. و دنيانڭ عمرى ايسه شمس الشموسڭ حركتِ محوريهسى ايله حاصل اولان أيّام ايلهدر.