(سعيد نورسىنڭ بر فقرهسيدر)
﴿بِاسْمِهٖ ۞ وَاِنْ مِنْ شَىْءٍ اِلَّا يُسَبِّحُ بِحَمْدِهٖ﴾
﴿اَلسَّلَامُ عَلَيْكُمْ وَرَحْمَةُ اللّٰهِ وَبَرَكَاتُهُ﴾
عزيز، صدّيق، حقيقتلى آخرت قارداشم و جدّى و قوّتلى آرقداشم!
قرآنِ حكيمڭ باش حاشيهلرنده، آياتِ قرآنيهنڭ عددى آلتى بيڭ آلتى يوز آلتمش آلتى اولمقله، أنوارِ قرآنيه و حقيقتِ فرقانيه أيّامِ شرعيه ايله آلتى بيڭ آلتى يوز آلتمش آلتى سنه قدر كُرۀِ أرضده حكمى جريان ايدهجگنه إشارت ايتديگنه دائر سؤالڭزه او وقت ذهنم باشقه يره متوجّه اولديغى ايچون ايضاحلى بر جواب ويرهمدم. صوڭره بڭا إخطار ايديلدى كه: عاصمڭ سؤالى أهمّيتليدر، جواب وير. بن ده او إخطاره بناءً، اوچ أساسله بر پارچه ايضاح ايدهجگم:
برنجى أساس:
ناصلكه نورِ محمّدى و حقيقتِ أحمديه عليه الصلاة والسلام، ديوانِ نبوّتڭ هم فاتحهسى هم خاتمهسيدر. بتون أنبيا، اونڭ أصل نورندن إستفاضه و حقيقتِ ديننڭ نشرنده اونڭ معينلرى و وكيللرى حكمنده اولدقلرى و نورِ أحمدى (عصم) جبهۀِ آدمدن تا ذاتِ مباركنه متسلسلاً تظاهر ايدوب نشرِ نور ايدهرك إنتقال ايده ايده تا ظهورِ أتمله كندنده جلوهگر اولمشدر.
هم ماهيتِ قدسيۀِ أحمديه، رسالۀِ معراجده قطعى بر صورتده إثبات ايديلديگى گبى، شو شجرۀِ كائناتڭ هم چكردكِ أصليسى، هم أڭ آخر و أڭ مكمّل ميوهسى اولمش. اويله ده حقيقتِ قرآنيه، زمانِ آدمدن شيمدىيه قدر حقيقتِ محمّديه (عصم) ايله برابر متسلسلاً أنبيالرڭ صحف و كتبلرنده نورلرينى نشر ايدهرك گله گله تا نسخۀِ كبراسى و مظهرِ أتمّى اولان قرآنِ عظيم الشان صورتنده جلوهگر اولمشدر.