إثبات ايدييور. أڭ معنّد منكردن تا أڭ خالص بر مؤمنه قدر هركس هر «حقيقت»دن حصّهسنى آلابيلير. چونكه «حقيقت»لرده موجوداته، آثاره نظرى چويرييور.
دير كه: بونلرده منتظم أفعال وار، منتظم فعل ايسه فاعلسز اولماز. اويله ايسه بر فاعلى وار. إنتظام و ميزان ايله او فاعل ايش گورديگى ايچون، حكيم و عادل اولمق لازم گلير. مادام حكيمدر، عبث ايشلرى ياپماز. مادام عدالتله ايش گورويور، حقوقلرى ضايع ايتمز. اويله ايسه بر مجمعِ أكبر، بر محكمۀِ كبرا اولاجق.
ايشته «حقيقت»لر بو طرزده ايشه گيريشمشلر. مجمل اولديغى ايچون اوچ دعوايى بردن إثبات ايدييورلر. سطحى نظر فرق ايدهمييور. ذاتًا او مجمل «حقيقت»لرڭ هر بريسى، باشقه رسالهلر و سوزلرده كمالِ ايضاحله تفصيل ايديلمش.
عبد المجيدڭ ايكنجى ناقص جوابى شودر كه:
او ذاتڭ ياڭليش سؤالنه مماشات ايدوب، ياڭليشنى قبول ايتديگى ايچون، ياڭليش ايتمش. چونكه اوننجى سوزڭ «حاشيه»سنده، إسمِ أعظم، يالڭز هر إسمڭ بر مرتبهسندن عبارت اولديغى ذكر ايديلمهمش. بلكه چوق يرلرده ديمشز: إسمِ أعظمدن و هر إسمڭ أعظمى مرتبهسندن تظاهر ايدر. إسمِ أعظمى إثبات ايتمكله برابر، هر إسمڭ بر مرتبۀِ أعظمى وار كه؛ رسولِ أكرم عليه الصلاة والسلام بونلره مظهر اولديغى گبى حشرِ أعظم ده اونلره باقييور. مثلا إسمِ خالق مراتبى، بنم خالقمدن طوت، تا خالقِ كلِّ شيئه قدر اولان مرتبۀِ أعظمه قدر مراتبى وار.
او شبههلى ذاتڭ، هر إسمڭ بر مرتبۀِ أعظمى اولديغنى تزييف ايتمك نيّتيله، متصوّفۀِ متفلسفه فكريدر ديمش. حالبوكه باشده إمامِ أعظم، إمامِ غزالى، جلال الدينِ