يگرمى آلتنجى مكتوبڭ دردنجى مبحثنڭ برنجى مسئلهسنڭ أوّلى و آخرى
﴿بِاسْمِهٖ ۞ وَاِنْ مِنْ شَىْءٍ اِلَّا يُسَبِّحُ بِحَمْدِهٖ﴾
﴿اَلسَّلَامُ عَلَيْكُمْ وَعَلٰى وَالِدَيْكُمْ وَعَلٰى اِخْوَانِكُمْ وَرَحْمَةُ اللّٰهِ وَبَرَكَاتُهُ﴾
عزيز، صدّيق و صادق، مخلص و خالص قارداشم إبراهيم خلوصى بك!
مكتوبڭده بيان ايدييورسڭ كه، أگيردير گبى اوراده موفّق اولمايورسڭ. اوندن تلاش ايتمه. اوراده اويله أسباب وار كه، بتون بتون توقّف و تعطيل نتيجهسنى ويرهبيليردى. جنابِ حقّه شكر ينه توقّف دگل، موفّقيت وار.
او معنوى أسبابدن برى شودر كه: جنّى شيطاندن درس آلان إنسان شيطانلرى، دنيوى مشغلهلرى ايله سنى بر چنبر ايچنه آلوب، نورلره خدمتڭى تحديد ايتمك ايچون، سزديرميهرك پرده آلتنده چاليشمشلر.
هم او حواليده سابقًا، مدهش عمليات و إجراآت اولديغندن، او محيطده بر اورككلك حاصل اولوب، سنڭ قلبڭدهكى غايت قوّتلى بر متانت اولماسه ايدى، او نورلر اوراده هيچ ايشيقلانديرميهجقدى. فقط اوراده آز خدمت ده چوقدر، قيمتداردر.
ثانيًا:
(بو قسم، يگرمى آلتنجى مكتوبڭ دردنجى مبحثندهكى درت مسئلهدن برنجيسنڭ «ثانيًا» قسمنڭ صوڭنه أكدر.)
«ربّ العالمين» تعبيرندن صوڭره «ربّ السمواتِ و الأرض» ذكرى، إجمالدن تفصيله گچمكدر. ناصلكه «مملكتِ إسلاميه حاكمى» تعبيرندن صوڭره؛ «آناطولى، آسيا و آفريقا حاكمى» تعبيرى حشمتِ سلطنتى مفصّلاً گوسترر. اويله ده ربوبيتِ مطلقهدن صوڭره، حشمتِ ربوبيتى مفصّلاً گوسترر. هر نه ايسه، شيمديلك سؤالنه تام جواب ويرهمييورم. اوڭا بدل قرآن إعجازينه عائد ايكى كوچك نكتهيى سويلهيهجگم.