ايكنجيسى: بيليرسڭز اوزاق يرلردن، بعض بش گونلك يولدن بر ذات بزى گورمك و اُخروى بر إستفاده ايتمك ايچون گلير. حالبوكه وضعيتم بر قاچ ساعتدن فضله اونڭله گوروشمهيى مساعده ايتمييور. حالبوكه، او مسافره رسالهلرڭ قيمتنى گوسترمك، اونى اونلردن إستفادهيه سَوق ايتمك، هم محتاج اولديغى قوّتِ ايمانه و قوّۀِ معنويهيه يارديم ايتمك ايچون، بر قاچ گون لازم. چونكه رسالهلردهكى قوّتلى برهانلره هركس يتيشهمييور، تماميله قاورامييور. روحم چوق آرزو ايدييوردى كه؛ قيصه، خفيف بر وسيله أليمه گچوب، بيچاره مسافرلرڭ زحمتى بيهوده گيتمهسين. فقط كرامتم يوق، أليمدن بر شى گلمز. يالڭز مسافرلرڭ نيّت و إخلاصنه إعتماد ايدوب اونلرڭ مكافاتنى رحمتِ إلٰهيهيه حواله ايدييوردم. ايشته جنابِ حق أوّل إشارات الإعجازده، صوڭره اوننجى سوزده چابوق قناعت ويرهجك و رسالهلره إعتماد ايتديرهجك بر أثرِ عنايت إحسان ايتدى. حقيقةً بنم ايچون چوق قولاى اولدى. بن ده چوق راحت ايتدم و چوق ذاتلره آز بر زمانده قوّۀِ معنويه و قرآنِ حكيمڭ حقّانيتنه گوز ايله گورونهجك أمارهلر گوسترييوردم. حتّى چوق معنّدلرڭ عنادى قيريلدى. چوق دينسزلر ده، اونڭله ايمانه گلديلر. فقط إشارات الإعجازدهكى ايضاحى بر، ايكى، اوچ ساعت بيتمييوردى. بن ده يورولويوردم. جنابِ حق كمالِ رحمتندن داها قولاى، إشارات الإعجازڭ ايكى ساعتده ويرديگى فائدهيى اوننجى سوز ايكى اوچ دقيقهده عين فائدهيى ويردى. بو زمانده گوز ايله گورونهجك غايت جزئى بر أثرِ عنايت، معنوى بيوك كرامتلردن داها تأثيرليدر. ايشته بو جزئى أثرِ عنايت هم بڭا، هم سزڭ گبى قارداشلريمه بر قولايلق تأمين ايتديگى ايچون، زياده أهمّيت ويردم. مادام بو سوزدهكى توافق بزه و مسافرلره چوق فائدهليدر و خيرلى نتيجهلر ويرر، ألبته ايچنده بر عنايت وار. عادى اولسون، يوز أمثالى بولونسون ينه بزه فوق العاده بر عنايت، بر إكرامِ ربّانيدر.